British Airwaysip Kinamut timmisartuussisarnerminik taamaatitsigallartoq
![](/sites/default/files/styles/image_934x467/public/article_images/20200129-085031-l-1920x1229we.jpg?itok=aDbw3Ex8)
Tuluit aatsaat pisariaqarluinnassappat Kinamut angalasarnissaat Tuluit Nunaanni oqartussaasunit kaammattuutigineqareersorlu tuluit timmisartuutileqatigiiffiat, British Airways, taama aalajangerpoq.
British Airwaysip Kinamut Kinamiillu januaarimi februaarimilu timmisartuussinissaralui taamaatinneqarallartut, timmisartuutileqatigiiffiup nittartagaani atuarneqarsinnaavoq.
- Kinamut Kinamiillu timmisartuussinerit tamaasa pilertortumik taamaatikkallarpagut, Kinamummi aatsaat pisariaqavitsillugu angalasoqarnissaa, nunanut allanut tunngasunut ministererqarfiup kaammattuutigimmagu taama aalajangerpugut, British Airways taama allappoq.
AAMMA ATUARUK Hannah Shanghaimi: Coronavirus peqqutigalugu Spaniamut nuulerpunga
Indonisiamiullu timmisartuutileqatigiiffiata, Lionairip, Kinamut timmisartuussisarnini taamaatikkallarai, pingasunngornermi ilisimatitsissutigaa. Korea Kujallermiullu timmisartuutileqatigiiffiat, Seoul Air, timmisartuussisarnerminik aamma taamaatitsigallarpoq.
Kinami coronavirusimik tuniluuttumik toqquteqartut maannamut ikinnerpaamik 136-usut pingasunngornermi nalunaarutigineqarpoq. Inuit virusimik taassuminnga tunillatsissimasut 6000-ngajaapput. Virusi taanna Kinami illoqarfissuarmi Wuhanimi uumasunik anngiortumik tuniniaaviit ilaannit siaruaassimassangatinneqarpoq.
Coronavirusi uumasuniit inunnut tuniilluussimassangatinneqartoq inuit akornanni aamma tuniluussinnaassangatinneqarpoq.
AAMMA ATUARUK Frankrig timmisartumik europamiunik aallertussamik Kinamukartitsisoq
Finlandimiut timmisartuutileqatigiiffiat, Finnair, timmisartuutileqatigiiffinni Kinamut Kinamiillu timmisartuussinermik taamaatitsigallartuni siullerpaavoq.
Tamatuma kingunerisaanik Helsinkimiit Beijingimut Nanjingimullu aallartussat eqqugaapput, Finnairili Beijingimut Shanghaimullu timmisartuussiuarsinnarpoq.
Angalaqatigiiaat Kinamut angalanissaannut Kinamit inerteqqutigineqareersorlu Finnair taama aalajangerpoq.
Finnairip Beijingimi Nanjingimilu mittarfinnut timmisartuussinissaraluini ilaasussarpassuisa ilarpassui angalaqatigiiaajupput. Sumiiffinnut taakkununnga timmisartuussinissat marsip tungaanut taamaatinneqarallarput.
AAMMA ATUARUK Dansk mand er ikke smittet med coronavirus
SAS pisarnermisut timmisartuussiinnarlunilu pisunullu malinnaaqqissaartoq, timmisartuutileqatigiiffiup ilisimatitsissutigaa.
- IATA-p (nunani tamalaani silaannakkut angallassinermut oqartussat kattuffiat, aaqq.) nunanilu ataasiakkaani oqartussat peqqussutaat innersuussutaallu malinnaavigaavut.
- Tamatuma saniatigut pisut soorunami malinnaavigeqqissaarpavut, SAS-p tusagassiisarfiani pisortaagallartoq, Kristian de Place Gamborg Hansen, oqarpoq.
SAS Hongkongimut sapaatip-akunneranut pingasoriarluni aamma Beijingimut Shanghaimullu ullut tamarluinnangajaasa timmisartuussisarpoq.