Kina: Kinami suliffeqarfiit paasissutissanik nunanit allaneersunik tigummiallit paasissutissaataat piumaneq ajorpagut
Kinami suliffeqarfiit paasissutissanik nunanit allaneersunik tigummiallit paasissutissaataat piumaneq ajorpagut. Kinami naalakkersuisut taama oqarput.
Nutaarsiassaqartitsivik AFP taama allaaserisaqarpoq.
Inoqatinut attaveqaqatigiittarfik TikTok atuunnassanerlugu atorunnaassanerluguluunniit nunat arlallit eqqarsaatersuutigigaallu taama pisoqarpoq. Paasissutissat isumannaatsumik paarineqarsinnaannginnerat atornerlunneqarsinnaaneralluunniit ernumassutaavoq.
Ernumassuteqarnissamulli pissutissaqanngitsoq, Kina maanna oqarpoq.
Suliffeqarfiit inuilluunniit ataasiakkaat inatsisinik unioqqutitsillutik paasissutissanik katersillutillu avitsisarnissaat Kinami naalakkersuisunit piumasarineqarnavianngitsoq, Kinap nunanut allanut tunngasunut ministereqarfiata oqaaseqartitaa Mao Ning oqarpoq.
Paasissutissat isumannaatsumik passunneqartarnissaat Kinami naalakkersuisut pingaartittorujussuugaat, taassuma ilanngullugu oqaatigaa. Nutaarsiassaqartitsivik AFP taama allaaserisaqarpoq.
Inoqatinut attaveqaqatigiittarfik TikTok nunarsuaq tamakkerlugu 1 milliardit sinnerlugit atuisoqarpoq.
TikTok USA-mi nunanilu killerni allani meeqqanit inuusuttuniillu nuannarineqartorujussuuvoq.
TikTokilu pillugu USA-mi maanna oqallittoqangaatsialeruttorpoq.
