USA-p naalakkersuisui TikTokimut: Piginneqataassutisi tuninngikkussigit app-ersi USA-mi inerteqqutaalissaaq
Kinamiut piginneqatigiiffiata TikTokimik piginnittuusup, ByteDancep, videonut app-imut piginneqataassutini tunissagai amerikamiut naalakkersuisuisa piumasaraat, taamaaliunngippatami TikTok USA-mi inerteqqutaalersinnaammat.
USA-p TikTok pillugu oqaaseqartartua, Brooke Oberwetter, taama uppernarsaavoq.
Amerikamiut naalakkersuisusa piumasaqaataat aviisimi The Wall Street Journalimi allaaserineqareersorlu tamanna pivoq.
USA-p præsidentiata illorsuanit oqaatigineqartoq naapertorlugu TikTok Amerikap naalagaaffiata isumannaatsuunissaanut ulorianartorsiortitserataannaavoq.
Taamaattumik amerikamiut inatsisartui, Kongressen, inatsimmik atuutilersitsimmata præsident Joe Biden TikTokip USA-mi inerteqqutaalersinneqarnisaanik psinnaatinneqalerpoq.
USA-p naalagaaffiata isumannaallisaanermut siunnersortaanera, Jake Sullivan, sapaatit akunnerata siuliani taama paasissutissiivoq.
Aviisip The Wall Street Journalip allaaserisaa naapertorlugu amerikamiut tuniniaaseqarfiat, nunat allamiut aningaasaliinerat USA-p naalagaaffianik ajutoorutaaratarsinnaanerannik naliliisartuusoq, Tik Tokimut taama piumasaqaateqartuuvoq.
Kinamiut piginneqatigiiffiat ByteDance TikTokimik piginnittuuvoq. TikTok app-ini aqqutigalugu amerikamiunik alapernaasersortartutut pasineqarpoq, pasilliutilli TikTokimit ilumuunnginnerarneqarput.