Kimmernap allasiorneq erinarsuutigaa

Suliaq aasarli aallartittoq ilusinikkiartorpoq Kimmernaq Kjeldsenillu cd-mik saqqummersitassaa Atlantic Musicimit maajip qaammataani saqqummersinneqartussatut naatsorsuutigineqarpoq.

Kimmernaq Kjeldsen 2006-imi cd-mik 'Tunissut'-mik saqqummersitseqqaarami tusaamasanngorpoq, ikinngutimi Pilu Lyngep erinarsuusiai taamani saqqummersillugit.

Frederik Elsner saqqummersitassamut erinarsuusiorsimavoq Atlantic Musicillu Københavnimi immiussisarfiani immiussisimalluni.

- Nanookip Kimmernaq erinarsortoralugu saqqummersitassarinngikkaa sianigeqqissaarsimavara, Frederik Elsner KNR.gl-imut oqaluttuarpoq.

- Sapaatip akunnera ataaseq sulinngiffeqarlunga angerlarsimaffinni erinarsuusiorpunga. Erinarsuutillu Kimmernamut tulluussaqqissaarlugit suliaapput, kisianni uanga erinarsuusiortuunera immaqa tusaaneqarsinnaassaaq, Frederik Elsner oqarpoq.

Immiussani nassarlugit qanittukkut angerlarpoq Kimmernaq Kjeldsenimullu tusarnaartillugit.

- Erinarsuutit Nanookkerpalaarpallaarnissaat eqqarsaatigisupilussuuasimavara. Kisianni erinarsuutit nutaajulluinnartuupput aammalu assigiinngiiaartupilussuummata erinarsuut ataasiinnaq tusarsimallugu cd tamaat naliligassaanngilaq. Tamarmik immikkut tusarnaagassaapput, Kimmernaq Kjeldsen KNR.gl-imut oqarpoq.

Nuummi tusarnaartitsineq

Erinarsuutit kalaallit naleqartitaannut tunngasupilussuupput. Ilaatigut oqaatsit, qanga pisimasut nalitsinnilu nutaaliaasumi unamminartut pillugit, soorlu assersuutigalugu allasiortarneq.

- Ilisimaneqartupilussuuvoq, erinarsuutinili tusarsaavallaarani. Taallat neriuuteqalersitsinasoraakka. Eqqugaasimasutut inissisimanngilagut siunissamulli isumalluarluta, Kimmernaq Kjeldsen oqarpoq.

Erinarsuutit ilaat oqaluttuartoqqamut 'Ikusimmiamut' tunngavoq, tassalu arnaq ikusimmiartoq kinguaariippassuarni oqaluttuarineqartartoq.

- Meeraallunga oqaluttuaq tusarnikuuara quilertagalugulu. Ukiorpassuarni eqqarsaatigisarsimallugu maanna erinarsuutinngorpoq, Frederik Elsner oqarpoq.

Qatitoortartoq Jens Simonsen tumerparpaartartorlu Anders Haaning Atlantic Musicip immiussisarfiani immiussisimapput, Anders Haaningilu tumerparpaanik nipimik nutaamik pilersitsisimalluni.

Kimmernaq Kjeldsen erinarsorneri immiukkiartorlugit marsip qaammataani Københavniliassaaq cd-llu maajip qaammataani saqqummersinneqarnissaa pilersaarutaavoq.

- Nuummi tusarnaartitseqqaarnissarput oktobarip qaammataata aallartinnerani Akisunerit Festivalimut atatillugu pissaaq. Saqqummersitsereernerullu kingorna qanoq nuannarineqartiginera tusarnaartitsinerit qanoq amerlatiginissaannut apeqqutaajumaarpoq aamma arlaanniit oktoberi sioqqullugu qaaqquneqassagutta soorunami ammaffigikutsoorparput, Kimmernaq Kjeldsen oqarpoq.