Kim Larsenip eqqaamasalikkersaarutai juullertinnagu saqqummilersut
Atuakkiortoq Jens Andersen suleqatigalugu, kunngissaq Frederik pillugu atuakkiamik, nersorneqaqisumik, saqqummersitsisimasoq, Kim Larsenip, meeranerminiit Gasolinikkut nipilersoqatigalugit nuannarineqalernerata tungaanut eqqaamasalikkersaarnera atuakkiarineqarpoq.
- Naapinnerit tamaasa Kim Larsen, Odensemi angerlarsimaffimmini igaffimmi piareersimalluni issiasarpoq, guitari, cigaritsit, kaffilu piareersimallutik, oqaluttuarnissamullu piareersimalluni, Jens Andersen, tusagassiutinut nalunaarummi ilaatigut oqarpoq.
AAMMA ATUARUK Kim Larsenip erinarsuusiai nuannarineqarluarput - aamma Kalaallit Nunaanni
Kim Larsenip nipilersortartuunerata saniatigut ilaqutai, meeraanera, inuusuttuuneralu atuakkiami sammineqarput.
Kim Larsenip eqqaamasalikkersaarutaanik atuakkiorusuttut amerlasuut ukiut ingerlanerini saaffiginnittarsimasut, Kim Larsenip isumaginnittuata Jørn Jeppesenip oqaluttuaraa.
- Kim Larsenili piumanngilaq, Jens Andersenili atuakkiorusummat Kim Larsen piumalerpoq, Jens Andersenimi atuakkiortutut ataqqisarivaa, isumaginnittoq oqarpoq.
Kim Larsenip eqqaamasalikkersaarutai Juullimut tunissutissaqqissutut immaqa siunnersuutigineqarsinnaapput, eqqaamasalikkersaarutimmi decembarip ulluisa sisamaanni saqqummersinneqarnissaat pilersaarutaavoq.