Kim Kielsen NunaMinerals pillugu: Annaanniarlugu qanoq iliuuseqarsimagaluarpugut
- Naalakkersuisut qanoq iliuuseqarnikooqaat. Kim Kielsen oqarpoq eqqaamaqqullugulu, Naalakkersuisut NunaMineralsip annaannissaanut piumassusermik takutitsereerlutik, 4,5 million koruuninik siorna tapiisimanertik.
- NunaMineralsip ingerlaannarnissaa orniginartinnerusimagaluarparput taamaattorli suliffeqarfiup aningaasalersuinnarnissaa aporfiusimalluni. Aamma sinaakkutissat assigiinngitsut iluini suliffeqarfiup sulisinnaaasimannginnera aporfiusimalluni, Naalakkersuisut siulittaasuat, Kim Kielsen (S) oqarpoq.
Nunamineralsikkut akilersuinermik unitsitsinikkut akiligassaqarfiit illersorneqarnissaannik qinnuteqarpoq. GMM-p Nunamineralsillu akornanni aaqqissuusseqqinnissamik isumaqatigiinnissaq anguniarlugu. Isumaqatigiissut Namminersorlutik oqartussanit Greenland Holdingimiit aningaasaliisartuniillu akuerineqartarialik.
NunaMineralsimiit nalunaarummi immikkut isiginiarneqarpoq Namminersorlutik Oqartussat akuersitinniarnissaat ajornassasoq.
Kim Kielsenilu radioavisimit oqaloqatigineqarami, suliffeqarfiup annaanneqarnissaanut tapersiinissaminut neriorsuuteqanngilaq.
- Ila qanoq iliuuseqarsimaqaagut. NunaMineralsip maanna killiffianut Naalakkersuisut Inatsisartullu siorna novembarimi aningaasaleeqataasimasut pisooqataapput. NunaMinerals annaanniarlugu suliassat assigiinngitsut ingerlanneqarsimapput. Oqaloqatigiinnerit pisarsimapput periarfissanillu ujartuisoqarsimalluni. Tullinnguupporlu GMM-ip nalunaarutaanik nalilersuinissaq, Kim Kielsen oqarpoq.
NunaMineralsip akiliisinnaajunnaarneranik unitsitsineq eqqartuussivimmit uppernarsarneqartoq, Naalakkersuisunit soqutigineqagaanngilaq. Tamannali suli qulakkeerneqanngitsoq, Naalakkersuisut siulittaasuata, KNR-mit oqaloqatigineqarnermini erseqqissarpaa, qiimmaallannermillu ersersitsinani, Kim Kielsen ima nangilluni oqarpoq.
- Qanoq tamanna inerneqarumaarnersut utaqqimaassavarput. Taamaattorli takussutissanik naammaginartunik tunniussisariaqarput peqartariaqarlutillu, Naalakkersuisut siulittaasuat, Kim Kielsen naqissusiivoq.