Killilersuutit marluk unnuap-qeqqanut atorunnaassasut: Nalunaaqutaq 13.00 tusagassiortunik katersortitsisoqassaaq

Naalakkersuisut nalunaaqutaq ataatsimut tusagassiortunik katersortitsissapput.

Nunatsinni coronamut killiffik sammineqassaaq, ullumilu unnuap qeqqanut killilersuutit marluk atorunnaartussaapput: Tassa neriniartarfiit imerniartarfiillu unnukkut qulinut matoqqusaanerat Qeqqata Kommunianilu imigassamik nioqquteqaqqusaannginneq.

Killilersuutillu taakku marluk atuutiinnassanersut suli ilisimaneqanngilaq.

AAMMA ATUARUK Corona pillugu ullumikkut kisitsisit: Tunillatsissimasut nutaat tallimanngormamit 430-t paasineqartut

Tamatuma saniatigut sumiiffiit killilersuiffigineqartut amerlapput, tassa: Aasiaat, Ilulissat, Kangerlussuaq, Maniitsoq, Narsaq, Nuuk, Qaqortoq, Qasigiannguit, Sisimiut, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq aamma Kullorsuaq.

Sumiiffinni taakkunani najugaqaruit coronapasimik takutitsisinnaassaatit. Tassa:

• Tamanit ornigarneqarsinnaasunukarniaraanni coronapassimik takutitsisoqassaaq. Tassa:
• Neriniartarfinni, cafeni, imerniartarfinni, qitigiartarfinni.
• Kulturip illuanni, filmertarfinni, katersugaasivinni saqqummersitsisarfinnilu.
• Atuakkanik atorniartarfinni.
• Katersortarfinni allanillu innuttaasut ataatsimoortarfianni.
• Illup iluani silamilu eqaarsaartarfinni, soorlu timersortarfiit, naluttarfiit, timigissartarfiit arsaatarfiillu.
• Nujaleriffiit, tagiartortittarfiit, allallu assigisaat.

Malittarisassat 2022-mi apriilip ulluisa tallimaata tungaanut atuupput.

Aamma illoqarfinni nunaqarfinnilu sumit tunillatsissimanermik ilisimaneqanngitsumik sapaatini akunnerni marlunni kingullerni tunillatsittoqarsimappat qanermut assiaqut atorneqassaaq.

• Aqqaneq-marluleereersimasut tamarmik ukunani qanermut kiinnamulluunniit assiaquteqassapput:
• Tamanit iserfigineqarsinnaasuni (pisiniarfiit, oqaluffiit, atuakkanik atorniartarfiit, neriniartarfiit assigisaalu.
• Busserunik taxanullu ilaagunik.

Nunatsinni alloriarnerit pingajuannut alloriartoqarpoq - tassa tuniluunneq siuaruangaatsiarlunilu ataavalermat peqqinnissaqarfik nukingertinneqalerpoq.

Nunatsinni covid-19-imik tunillatsissimasut katillugit 15-it napparsimmavimmi uninngapput.

Tunillatsissimasunit uninngasunit qulingiluat coronaanngitsumik pissuteqarlutik uninngapput, coronalu unitsinneqarneranut pissutaanani.

Uninngasunit ataatsip corona napparsimanerminut sunniuteqartutut malugisimavaa. Taamaakkaluartorli nappaat alla pissutigalugu uninngalluni.

Uninngasut tallimat coronamik pissuteqarlutik uninngapput.

Uninngasunit 15-init qulingiluat Nuummi uninngapput, marluk Ilulissani, marluk Qaqortumi, ataaseq Upernavimmi ataaserlu Uummannami.