Kilisaataatillit sinneqartoorutinit akitsuutit piumaneruaat
Raajanut akitsuutit ukiortaamiit qaffattussaapput. GA isumaqarpoq, kiilumut akitsuusersueriaaseq atorunnaarlugu, allaanerusumik akitsuusersuisoqartariaqartoq.
Kaaviaartitat tunngavigalugit akiliisoqasasoq kissaatiginngilarput, sinneqartorutillu tunngavigalugit. Tassalu allatulli akileraarusersorneqarnissarput kissaatigaarput, GA-mi sulianik ataqatigiissaarisoq, Jens K. Lyberth, oqarpoq
Raajanut akitsuutit ukiortaamiit qaffassapput, kiilumut 11 koruunit 70-øreqaleraangata akitsuutinik akiliisoqartassalluni, siornatigut 13 koruuni tikikkaangassuk aatsaat akiliisoqartaraluartoq, Sulisitsisut Peqatigiiffianni, GA-mi, sulianik ataqatigiissaarisoq, Jens K. Lyberth, oqarpoq.
Aningaasaqarnermut naalakkersuisoq, Palle Christiansen, raaajanut akitsuutit pillugit Inatsisartuni oqallinnermi oqarpoq, raajanut akitsuusiisarneq utaqqiisaasumik aaqqiinerusoq.
Allaanerusumik akileraariaaseqalernissaq akitsuuseeriaaseqalernissarlu siunertaralugu, Naalakkersuisut aalisarnermik inuussutissarsiutillit oqaloqatigisaraat, Palle Christiansen, oqarpoq.
- Kisianni pisuussutinik, inuiaqatigiit pigisaannik, atuinermi akiliisoqartassasoq, Palle Christiansen erseqqilluinnartumik oqarpoq.
Pigineqatigiiffiit avataasiorlutik raajarniartut arfinillit katillugit 81 millioni koruuninik siorna sinneqaartoorsimapput.
Kisianni aalisartut nunani allani aalisartunut unammillersinnaassappata, sinneqartoorutit taama amerlassusillit amerlagisassaanngitsut GA-miit oqaatigineqarpoq.
- Kilisaatillu nutarterneqartuassappata unammillernerlu pitsaasuujuaannassappat, kilisaataatilllit ileqqaaruteqartariaqarput. Taava apeqqutigineqarsinnaavoq, ileqqaarsimagaannit, taava qanoq uiluanaaruteqartoqarsinnaanersoq, kilisaatillu nutarterneri akisusarmata, sinenqartoorutit 81 millioner koruunit amerlasoorsuartut oqaatigineqarsinnaanngillat, Jens K. Lyberth oqarpoq.
Atuinermi aningaasartuutit, soorlu nakkutilliinermi ningaasaertuutit ilaat, avataasiorlutik raajarniat akileeqataaffigerusukkaat, Jens K Lyberthip, erseqqissarpaa.
