Birna pillugu suliaq: Kilisaatip naalagaata politiit isertortumik suleqatigigai
Tuluit aviisiata allaaserisaanut ingerlaqqiffissaq allaaserisap naqqaniippoq.
Arnap inuusuttup islandiumiup Birna Brjansdottirip toqutaanera pillugu suliami tigusarinnittoqarneranut kilisaatip nunatsinneersup naalagaa pingaarutilimmik inissisimavoq.
Tuluit aviisiata The Guardianip pisoq Island tamakkerlugu aalassatsitsisoq pillugu long readiliaani (takisuuliorluni allaaserisaq, aaqq.) tamanna allaaserineqarpoq.
Allaaserisami paasissutissat saqqummertut nutaat soqutiginarnerit ilagaat toqutsisutut pineqaatissinneqartup Thomas Møller Olsenip kilisaammi nunatsinneersumi Polar Nanumi tigusaanerani qanoq pisoqarsimanera.
AAMMA ATUARUK Birnamik toqutsineq ikiaroornartulerinerlu ukiuni 19-ini parnaarussaassutigissagaa
The Guardian naapertorlugu, Birnap periarfeerunneqarnera politiit misissuineranni Polar Nanumut atassuserneqarmat Reykjavikimi politiit ilungersunartumik inissisimapput. Kilisaammi piffissap taamaalinerani nunatta imartaaniippoq islandimiullu politiivi qanoq iliuuseqarsinnaanngillat.
Taamaakkaluartoq pilersaarut aallartisarneqarpoq. Islandimiut politiivi danskit alapernaarsuutaannut Tritonimut nunatsinni politiinik kilisaammi pasisanik marlunnik tigusarinnittussanik aallerluni nunatsinnut ingerlaartumut ikiartortinneqarput, The Guardian ilaatigut Islandimi paasiniaanermi pisortaasumik oqaloqateqarsimasoq taama allappoq.
AAMMA ATUARUK Qulimiguulik kalaallit kilisaataataannukartinneqarpoq
Polar Nanumili naalakkap kilisaatip arnap inuusuttup periarfeerunneqarneranut atassuserneqarnera paasisimavaa.
Inuttami tamatumunnga attuumassuteqarsinnaanerat ernumassutigilerpaa. Motoorimillu ajornartorsiuteqalertuusaarluni Reykjavikkip tungaanut aallarpoq. Kilisaatip naalagaata aamma kilisaatip wifi-kkut attaveqaataa qamippaa, suliap tusagassiuutitigut sammineqarnera inuttanut isertuunniarlugu.
Polar Nanorlu Islandip imartaanut pimmat islandimiut politiivi immikkut sungiusakkat arfinillit Polar Nanoq erngullutik ikiffigaat inuttallu marluk tigusaralugit.
AAMMA ATUARUK Polar Nanumi inuttat marluk politiinit tigusarineqarput
Angut tigusarineqartoq ataaseq kingorna pasisaajunnaarpoq iperagaallunilu. Tiguarineqartulli aappaa Thomas Møller Olsen taamanili Islandimi parnaarussaaqqavoq.
Taanna toqutsisimasutut hashimillu anngiortumik eqqusseriarsimasutut ukiuni 19-ini parnaarussanngortitaalluni siorna septembarip qaammataani eqqartuunneqarpoq. Thomas Møller Olsen suliap ingerlanneqarnerani toqutsinermut pinngitsuunerartuarpoq eqqartuussullu siorna oktobarimi suliareqqitassanngortippaa.
Tuluit aviisiata long readimik allaaserisaa uani atuarneqarsinnaavoq.
