Kiliffaat nungutaanerannut suna peqqutaava?
Silap pissusaatali sutigut allanngornerata kingunerisaanik uumasut taakku nungutaasimappat? Ukiut 10.000-it matuma siorna uumasorpassuit sumik peqquteqartumik toqorarsimanerannut uppernarsaatissamik ujarlertuarsimapput, maannalu tassa nassaarisimavaat!
Siissisut meqqulissuit nunami qeriuaannartumi nassaarineqartut aqajarormiuinik Issittumilu tamarmi kinnernik ujaranngornikunik misissuinikkut uppernarsaatissaq nassaarineqarpoq.
Ilisimatooq nunarsuaq tamakkerlugu tusaamasaq, professor Eske Willerslev, ilisimatuussutsikkut atuagassiami tusaamasani Naturemi taama allaaserisaqarpoq.
Nunarsuup affaata avannarliup nunataa sermersuaqarnerata nalaani ivikkanik kajortunik qaamasunik qalligaanerusimanissaa maannamut ilimagineqarsimagaluarpoq. Taamaattoqanngilarli. Nunami assigiinngissitaarnerusimavoq uumasorujussuillu, soorlu siissisut kiliffaallu ivikkanik naasunillu proteineqarluartunik nerisaqarsimapput.
Sermersuulli siaruaakkiartornerata ilutigisaanik naasut assigiinngissitaarpallaarunnaariartorput uumasorujussuillu neriniarfissaarukkiartulerlutik.
Ukiullu 10.000-t missaat matuma siorna sermersuaqarnerata qaangiutereernerani kissatsikkiartoqqilerpoq. Naasulli allarluinnaat naasalerput. Uumasut nerisannaavi - naasut proteineqarluartut - peerupput - tamannalu uumasunut ajorluinnartumik kinguneqarpoq.
Ilaatigut siissisut meqqulissuit, umimmaat kiliffaallu Kangiani Amerikamilu Avannarlermi toqorarput, Eske Willerslev, uumasorujussuit nungutaanerannut uppernarsaatissamik tigussaasumik nassaarsimasoq oqaluttuarpoq.
Ilisimatuullu erseqqissaatigaa nunarsuup maanna kissatsikkiartorneranut atatillugu assingusumik aamma pisoqarsinnaasoq.
- Gassit silaannarsuarmik mingutitsisut annikillisissimagaluarlutigit, taamatullu silaannaq nillernerulaalersimagaluartoq, pinngortitami ataqatigiiaarnerit silaannaap kissatsikkiartulernerata siorna pissuserisartik imaaliallaannaq atisinnaanavianngilaaat, Eske Willerslev oqarpoq.
