Kikkut Danmarkiliassanerat aalajangeriigaaneq ajorsimavoq
Qallunaat Nunaannut meeqqat ukioq ataaseq nassiunneqartarnerat taamungaannaq aaqqissugaasoq misissuinerup takutippaa.
-Kalaallit meeqqatik ilinniagartuunngornissaat kissaatigigunikku, allatut ajornartumik Qallunaat Nunaannut ukioq ataaseq atuariartortittaraqartarpaat, atuarnerannilu angajoqqaarsiani ilisarisimanngilluinnagaanni najugaqartittariaqartarlugit. Tamanna kalaaliaqqat 1961-imiit 1976-ip tungaanut Qallunaat Nunaannut nassiunneqartut nakkutiginnittuata Kirsten Gynter-ip allagarisimasaani atuarneqarsinnaavoq.
Meeqqat kikkut Qallunaat Nunaannut atuariartortinneqassanersut aalajangiutinnginnerani, siullermik atuagarsornikkut piginnaasaat, tassalu kalaallisut, qallunaatut kisitsinermilu misilitsissutigineqartarput, kingornalu ilinniartitsisuminnit nalilersuiffigineqariarlutik naggataatigut Nuummi atuarfiup pisortaanit aalajangiunneqartarpoq kikkut Qallunaat Nunaannut ukioq ataaseq atuariartortinneqassanersut.
Taamaakkaluartoq kalaaliaqqat kikkut, ilinniagartuunngornissaminnut periarfissinneqassanersut taamungaannaq aalajangigaasarnera, kikkut Danmarkiliarnissaminnut piukkunnaateqarsut misilitsittarnerini takussutissani takusinnaallugu Christian Ydesen ph.d-nngorniarluni misissueqqissaarnermini paasisaminik nassuiaavoq.
-Atuarfinni assigiinngitsuni linniartitsisut, meeqqanik aallartussanik nalilersuinerminni aaliangiinerminnut tunngavigisaat assigiinngisitaartorujussuupput.
Taamaalilluni kikkut nassiunneqassanersut taamungaannagaagajuttarluni, minnerunngitsumillu atuarfiup pisortaata aalajangiineranut suut tunngaviusartut tassaasimapput Qallunaat Nunaanni angajoqqaarsiangortussat kissaataat, tassalu meerarsiarigallagassartik niviarsiaraassanersoq nukappiaraassanersorluunniit, kiisalu aningaasat qanoq amerlatigisut suliamut immikkoorsinneqarsimanersut Christian Ydesen nassuiaavoq.
Qallunaatut piginnaasaqarneq kikkut Qallunaat Nunaannukarnissaannut aalajangiinermi tunngaviunerpaasarpoq.
-Meeqqat qallunaatut ilikkapallassinnaaneq piginnaaneqarfigisariaqarpaat, sukkanerusumik ilinniagaqarsinnaaqqullugit.
Meeqqat ilai 5. 6. aamma 7. klasset qallunaat nunaannut nassiunneqartarput, ukioq ataaseq realskolernissaminnut piareersarfigissallugu.
1966-miit 1971-mut meeqqat realskolessagunik taamaallaat Qallunaat Nunaanni ukeeqqaarlutik aatsaat realskolemut isersinnaapput, realskolerniaraanni Kalaallit Nunaanni piareersarfiusumik atuarfeqanngimmat. Meeqqallu Kalaallit Nunaannut utertussat neriulluarfigineqaqaat.
