Kiisami: Uummannap ilarujussuani kuuffimmit imertoqarsinnaalerpoq
Uummannap ilarujussuani kuuffinnit imeq ima minguitsigilerpoq allaat imerneqarsinnaaleqqilluni. Taamaalillutik Uummannami innuttaasut kuuffimmit imermik minguitsumik imersinnaaleqqipput.
Nukissiorfiit tallimanngornermi ualikkut taama nalunaaruteqarput.
Imeq pillugu suliaq naatsumik:
- Septembarip 20-at: Uummannami imeq uuliamik mingutsinneqarsimasoq innuttaasut ilisimatinneqarput. Tamanna septembarip 11-anni pisimasoq, tassanilu Nukissiorfinni sulisup klori akuutissaq atornagu uulia akuleruttoorsimavaa.
- Innuttaasup piffissami tassani pasitsaassaqalerput, imermi uuliarsunnittoq naamaneqarsinnaammat.
- Nukissiorfinni sulisut imermut klorimik kuisigaangamik kiinarpaqartarput, taamaammat sulisup uulia kuigamiuk naamasinnaasimanagu, Nukissiorfiit ilisimatitsipput. Uulia klorilu assigiillutik akimut ersittumik qalipaateqarput.
- Uummannami tunisassiorfiit septembarip 19-aniit ullualunni matoqqasarsimapput.
- Meeqqat atuarfiat meeqqeriviillu aamma matoqqatinneqarnikuupput, maannali ammaqqinneqarsimallutik.
- Imeq minguitsoq imertartarfinnut pisillugu Uummannamut assartartorneqartarpoq, taamaalilluni innuttaasut namminneq imertartarlutik. Umiarsualivimmit nilaat aamma agguaanneqartarput.
- Imeqarfimmi imeq minguitsunngorsimasoq septembarip 29-anni nalunaarutigineqarpoq. Imeqarfimmiilli erngup akuerineqarnera Nukissiorfinnit aqaguani uterteqqinneqartariaqarluni.
- Imeq qaqugu imerneqaqqissinnaalissanersoq Nukissiorfinnit suli oqaatigineqarsinnaanngilaq.
- Nuannaarutigaara Uummannami illoqarfiup ilaani imeq imerneqarsinnaalersinneqarmat. Tamatuma kingunerissavaa innuttaasunut suli amerlanerusunut ajornannginnerusumik atugaqalersitsineq, tassa nalinginnaasumik imermik pilersorneqaqqilerput, soorunami illoqarfiup sinneranut suliarput ingerlatiinnassavarput. Tassa Uummannami innuttaasut tamarmik nalinginnaasumik atugaqalersinneqaqqinnissaat, Nukissiorfinni tekniskimut pisortaq, Kenneth Nyland, oqarpoq.
Uummannami innuttaasut septembarip 19-iannili ilungersungaatsiarput. Kuuffinnimi imeq septembarip aqqarnanili uuliamik mingutsinneqarsimasoq paasissutissiissutigineqarpoq. Ullormi tassani NUkissiorfinni sulisup klori imermut akulerunnagu uulia akuleruttoorsimavaa.
Uulia imermut akulerunneqartoq
Sulisup uuliamik kuisinera kukkuneruvoq, tamannali innuttaasunut kingunerlungaatsiarpoq. Uuliami erngup aqqutaanut ataqatigiittunut akulerunneqarpoq – taamaattoqarneraniillu kuuffinneersoq imeq imerneqaqqusaajunnaarluni.
Innuttaasup qorsummik nalunaarsorneqarsimasumi najugaqartut kuuffimmiit imersinnaaleqqipput.
Nakkutilliinermulli oqartussat illoqarfiup ilaani imermik imernissaq peqqinnissamut aarlerinarunnaartoq maanna nalileraat Nukissiorfiit nalunaaruteqarput.
Illoqarfimmili sumiiffiit ilaanni erngup aqqutaani imeq suli imerneqaqqusaanngilaq. Sumiiffinni taakkunani imeq atisanik errorsinermut, uffarnermut eqqiaanermullu atorneqarsinnaavoq. Nukissiorfiillu erngup sumiiffinni taakkunani imerneqarsinnaalernissaa sulissutigeqqilerpaat.
