Kiisami !

Illuliat taakkua marluk, sivisuumik iserterfigineqarsinnaasimanngitsut Hans Enoksen-ip illuutipalaavinik taagorneqartut, aappaanut isertertoqarmat Oqaatsuni nuannaartoqarpoq.

Illuliat aappaani qulliit ikumasut takullugit nuannerpoq, Lene Leed Oqaatsuni najugalik unnersiorpoq.

Illulianut taakkununnga isertertoqarnissaa ilimagiunnaarsimagaluarparput, Lene Leed oqarpoq," illut taakkua inoqaratik napaannartut nunaqarfimmi oqallissaajualerput illut takkua pillugit KNRip siorna decemberimi sammilermatigit" Lene Leed oqarpoq.

Illuliat taakkua marluk iserterfigineqarsinnaaneranut ulluliussaq arlaleriarlugu kinguartinneqarmat, iserterfigineqarsinnaanerannut nunaqarfimmiut neriuutaarukkaluarput.

Illuliat aappaata suli iserterfigineqannginnera pillugu Oqaatsuni innutaasut paasitinneqanngillat aamma qaqugu iserterfigineqarsinnaanersoq pillugu aamma paasitinneqaratik.

Illut iserterfiginneqarsinnaannginnerat pillugu oqartussat akornanni assortuuttoqarpoq, tassalu kommunemi atorfillit, najukkami politikerit, inissiaatileqatigiiffik, illuliat sananeqarneranni isumaginnittut, sanasullu akornanni isumaqatigiinngittoqarmat.

Illut taakkua Naalakkersuisut siulittaasorisimasaannit Hans Enoksen-imit nunaqarfimmut tunissutaapput. Tunissutit qanoq akisutiginerat pillugu radioaviisimit oqaluttuaraarput.

Illuliat taakkua marluk Qaasuitsup kommuneanut tunniunneqarnerat kommunimut millioni koruuninik akeqarput, aammalu illut taakkua inoqannginneranni kiassarneqarnerat nunaqarffimi aqutsisut aningaasaataat amerlagisasaangitsut atorlugit ukiut marluk kiassarneqarput, 30.000,00 kr-ninik akeqartunik.

Oqaatsuni illuliat KNR-imi allaaserineqarnerat nittartakkami KNR.GL-imi atuarneqarsinnaapput.