Kigutigissarnermut ullorititami meeqqat kigutigissaqatigiissasut
Ulloqartitsinermi kigutigissartarnerup pingaaruteqassususia qitiutinneqassaaq.
Taamaammat nunatsinni atuarfinni paaqqinnittarfinnilu tamani maajip ulluisa 24-anni ullaakkut nal. 9.30 kigutigissartoqassaaq.
- Aaqqissuussinermi meeqqat qarngisa ipiitsuutinnissaat qitiutipparput. Nuannisartoqarlunilu ataatsimoortoqassaaq, aammali ilungersunartortaqarpoq.
Taamaammat meeqqani angajoqqaanilu kigutigissarnermi pitsaasunik ileqqoqalernissaq anguniarlugu kigutigissarneq qitiutipparput, kigutit nakorsaasa qullersaat Lone Mahnfeldt nassuiaavoq.
Kigutigissarnermut ullorititaasoq ukiumut ataasiarluni ingerlanneqartarpoq sammisallu tamarmik illoqarfinni nunaqarfinnilu paaqqinnittarfinni atuarfinnilu kigutigissaanermik suliaqartut qanimut suleqatigiinnerisigut ingerlanneqartarpoq.
Kigutileriviit ilaanni aaqqissuussineq atuarfiit anitsiartarfiini ingerlanneqassaaq, allani atuarfiit inersuini atuartitsiviunngitsuni illoqarfiillu ilaanni, soorlu Narsami illoqarfiup qeqqani tasinnguup eqqaani sammisaqartitsisoqassaaq.
Kigutit paarilluarnissaanniik kigutilerisup siunnersuutai:
- Ullaakkut unnukkullu kigutitit salilluartakkit
- Meeqqat qulinik ukioqalernissaata tungaanut kigutigissarnerani ikiortaruk
- Kigutit qaqorsaataat fluoreqarneq - ajornanngippat 1450 ppm-imik fluoritalik atortaruk
- Ulluinnarni mamakujuit, sodandit saftilu unitsikkit
