Kigutaasartaarniat suli sivisunermik utaqqisariaqassapput

Radioaviisimiit arfininngormat oqaatigaarput nunatsinni kigutit nakorsaat amigaataasut, tamannali kukkuneruvoq. Nunatsinni kigutit nakorsaat amerliartorput, kigutaasiortunilli amigaateqartoq paasitinneqarpugut.

- Kigutaasiortut nunatsinni ajoraluartumik amigaataasorujuussuupput. Taamaallaat qulingiluat kigutaasiortuutigivagut, kigutilerisuni qullersaq Olina Hansen oqarpoq.

Kigutit nakorsaat nunatsinniittut amerliartorput. Atorfinni 26-usuni 19-it atorfinitsinneqarsimapput. Akerlianilli kigutaasiortartunik pissarsiniartarneq ajornartorsiutaasoq, Oline Hansenip oqaatigaa. Massakkorpiaq nunatsinni kigutaasiortut qulingiluaapput. Nunatsinnili kigutaasiortunik atorfinitsitsiniarneq ajornartorsiutaavoq.

- Ukiorpassuarni kigutaasiortartunik pissarsiniarnissaq ajornartorsiutiginikuuarput. Nunanut allanut sanilliullugu Kalaallit Nunaanni kigutaasiortut aningaasarsiaat annikinnerunerat peqqutaasinnaavoq, Olina Hansen oqarpoq.

Carl Jeppson Qasigiannguaneersoq kigutaasartaarniarluni siornali utaqqilerpoq. Neriorsorneqarsimavorlu kigutaasanik marlunnik sanaanneqarumaartoq, juunillu qaammataani tigussamaarai aamma neriorsorneqarsimalluni.

Carl Jeppsonimulli ajuusaarnartumik Nuummi kigutileriffimmit nalunaarfigineqarpoq kigutaasiortartumik Qasigiannguanut tikittoqarnavianngitsoq. Taassumallu piffissaq suli utaqqisariaqassanini nuannaarutiginngilaa. 

- Soorunalimi pisoq Carl Jeppsonimut pisoq ajuusaarutiginaqaaq. Neriorsorneqareerluni, neriorsuutillu eqquutsinneqaratik. Kisianni kigutaasiortukitsigaluta, suliassallu amerlasut nalinginnaasuuvoq ukioq ataaseq sinnerlugu utaqqisitaaneq, Olina Hansen oqarpoq.

Kigutaasartaarniarlutik utaqqisut ikileriassappata kigutaasiortartut pingasut sisamalluunniit pissarsiarineqartariaqartut Olina Hansenip oqaatigaa. Ilinniartitsinissarlu aqqutissaasoq aamma oqaatigalugu.

- Taanna ajornartorsiut qaangerniarneqarsinnaavoq immaqa kigutileriffeqarfinninngaanniit erseqqinnerugutta inuusuttut GU-mi naammassilersunut erseqqitsinnerugutsigu qanoq kigutaasiortut amigaataatigisut, kigutilerisuni qullersaq Olina Hansen oqarpoq.

Kigutaasartaarniarlutik utaqqisut qanoq amerlatiginersut Olina Hansenip oqaatigisinnaanngilaa. Oqaatigiinnarsinnaavaali amerlasut.