Kielsen Tasiilamik ikioqqunissaq pillugu: Siumut ikinnerussuteqalerumanani tunniutiinnarpoq
Meeqqat kinguuaassiuutimikkut atornerlunneqartarnerat Inatsisartut ataasinngornermi sivisuumik oqallisigaat. Naalakkersuisummi amerlanerussuteqartunut, Naalakkersuisut Tasiilami nunattalu sinnerani meeqqat ikiorneqarnerisa qaavatigut Danmarkimiit ikiorneqarnissamut amerlanerussuteqarlutik noqqaassuteqaqqusisunut tunniutiinnarput.
Amerlanerussuteqartut tassaapput illua tungiliuttut Naalakkersuisunullu ikorfartortit Demokraatit.
Isumaginninnermut naalakkersuisoq Siumumeersoq, Martha Abelsen, Danmarkimiit ikiorneqarneroqqunissamut maannamut itigartitsisarsimavoq. Naalakkersuisulli siunnersuummut isumaqataasut ullumi erserpoq.
AAMMA ATUARUK Naalakkersuisut akuersiinnarput: Tasiilami meeqqat pillugit Danmarkimut ikioqqussaagut
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat.
Martha Abelsenip apersornissaa suli iluatsinngilaq, Naalakkersuisulli siulittaasuata Kim Kielsenip (S) partiimi isumaa sooq allanngornersoq KNR-imut ima nassuiarpaa.
- Partiit taakkua arlaliusut qaqitsisimanerisa takutippaat, naalakkersuisut ikinnerussuteqartussanngorlugit tassani iliuuseqarnissaq. Taamaammat naalakkersuinikkut oqariartuuteqarpugut iliuuseqarfiginiarlugit, kisianni sunik ikiorneqarnissaminnik oqariartuuteqassanersut pissanganassaaq, Kim Kielsen oqarpoq.
Taanna oqaluttuarpoq, danskit qanoq ikiuissanersut suli naluneqartoq.
- Uani sorpianik ikiorneqarnissarput saqqummiunneqanngilaq. Taamaammat suut oqariartuutissatut kissaatissaneraat taqqamani inatsisartut inersuani naalakkersuisut qanoq peqquneqassanersut ilisimatinneqarumaarpugut, Kim Kielsen oqarpoq.
Oqallinneq sakkortusisoq
Tasiilap meeqqanik kinguaassiuutitigut atornerluinermik imminullu toqunnermik ajornartorsiuteqarfiunera pillugu piviusulersaarut ”Byen hvor børnene forsvinder” DR-ip aallakaatimmagu Isumaginnittoqarfimmik isornartorsiuisoqartupilussuanngoqqippoq.
Taavalu illuatungiliuttut Demokraatillu nunatta Danmarkimit ikiorneqarnerunissaa ingerlaannaq piumasaraat. Taamaammat Naalakkersuisut Tasiilami nunattalu sinnerani inuuniarnikkut ajornartorsiutit pillugit naalagaaffimmit ikiorneqarnissamut akuersiinnarnerat Demokraatineersup Randi Vestergaard Evaldsenip tusarmagu nuannaarpoq.
AAMMA ATUARUK Kim Kielsenip allattaa appisaluussivoq: Facebookikkut soraarniuteqartoq
Tasiilami kinguaassiuutitigut innarliinerit
Tasiilami pigisaanilu kinguaassiuutitigut pinerliinerit ukiut pingasut kingulliit ingerlaneranni 193-it nalunaarutigineqarput.
Meeqqanut kinguaassiuutitigut atornerluinerit 20-t siorna nalunaarutigineqarput.
Tasiilami pigisaanilu meeqqanut kinguaassiuutitigut pinerluttuliornerit 15-it maanna suliarineqarput.
Meeqqat illersuisuata aamma nalunaarutigaa nalunaarutigineqarsimanngitsut amerlasoorujussuusut.Agguaatigiissillugu meeqqat pingasuugaangata ataaseq kinguaassiutitigut atornerlugaasarpoq, meeqqallu marluugaangata ataaseq kommunemi isumaginninnikkut suliassaasarpoq.
- Qujavugut Naalakkersuisut uani mumimmata aammalu ikiorserneqarnissamik qujanartumik ammaassillutik, Randi Vestergaard Evaldsen KNR-imut oqarpoq.
Tarnip pissusaa pillugu immikkut ilisimasallit isumaginninnermullu siunnersortit amerlanerunissaat kissaatigigaa
Demokraatilli Danmarkimit qanoq ikiorneqarnissamik kissaataat ersarinnerupput.
- Suulluunniit ilinniarsimasut atorfissaqartippagut. Inunnik isumaginninnemi siujersortit, tarnip pissusaanik ilisimasallit psykoterapeutit assigisaallu atorfissaqarteqaagut, Randi Vestergaard oqarpoq.
Taanna oqarpoq, kinguaassiutitigut atornerluillutik pinerluttut sakkortunermik pineqaatissinneqartarnissaat periarfissaasoq.
- Pineqaatissinneqarnerannut soorlu sakkukippallaartumik pineqaatissinneqartarneri pivagut, taakku sakkortusineqartariaqarput. Ilumoorsinnaanngilaq, meeqqat atornerlugaasimappata pineqaatissinneqarsimasoq ingerlaannaq aqqusinermi aqaguani naapissinnaassagaa, Randi Vestergaard Evaldsen oqarpoq.
