Kielsen: Nunarput kingumut coronamik tunillatsissimasuerupppoq
Inuit marluk Aasianniittoq Ilulissaniittorlu coronavirusimik tunillatsissimasut peqqisseqqipput. Taamaalilluni nunatsinni coronamik tunillatsissimasuerulluni.
Tunillatsissimasunit napparsimmavimmut unitsitsisoqarnikuunngilaq – taakku angerlarsimallutik mattusimaannarput.
Ammaasoqarnissamut periusissaq:
Immikkoortoq 1:
Danmarkimi tunillatsittunik misissuinermi tunillatsissimasut 5 % qaangersimanngippassuk ammananissaq aallartinneqarsinnaassaaq.
Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa.
Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput.
Tamatuma saniatigut massakkut peqqusinerit innersuussutillu aalajangiusimaannarneqassapput.
Immikkoortoq 2:
Ammaanerup immikkoortuata aappaani Kalaallit Nunaanni tunillatsissimasinnaasut amerlassusaat ilisimaneqarlutillu suliarineqareersimassapput.
Danmarkimi innuttaasut misissuiffigineranni tunillatsittut amerlassusaat 2 %-imik qaangiisimassanngillat.
Sapaatip akunneranut timmisartumut ilaallutik tikittut amerlanerpaamik 1200-iusarnissaat ammarnerup kingunerissavaa.
Angalasut aallarnissaq sioqqullugu misissortinnermi tunillatsissimassanngillat, tikereernerullu kingorna ullut tallimat qaangiunnerisigut misissorteqqissallutik. Angalasut misissortinnermi tunillatsissimannginnermut inernerit pigilernissaat tikillugu mattusimaneqassapput.
Tamatuma saniatigut massakkut peqqusinerit innersuussutillu aalajangiusimaannarneqassapput.
Immikkoortoq 3:
Ammaanerup immikkoortuata pingajuanni Kalaallit Nunaanni tunillatsissimasinnaasut amerlassusaat ilisimaneqarlutillu suliarineqareersimapput.
Danmarkimi innuttaasunik misissuinermi tunillatsissimasut amerlassusaat 1 %-imik qaangiisimassanngillat.
Ammaneq timmisartunut ilaasut amerlassusiisa killilersuiffigineqannginnissaannik kinguneqassaaq.
Angalasut tikereerlutik tunillatsissimannginnermut misissortissapput. Massakkut innersuussutaasut ingerlaannassapput, peqqusinerilli unitsinneqarlutik.
Innuttaasut tamarmik COVID-19-imut ersiuteqarnerlutik misissortissapput, nappaammullu ersiuteqartoqarpat angalannginnissamik kikkut tamarmik kaammattorneqarput.
Nutaarsiassaq taanna ippassaq saqqummiunneqarpoq, tamannalu Naalakkersuisut siulittaasuata, Kim Kielsenip tusagassiortunik ullumi katersortitsisoqarnerani oqaaseqarfigaa.
- Nunatsinni coronamik tunillatsissimasuerunnera nuannaarutissaavoq, Naalakkersuisut siulittaasuat oqarpoq.
Nunarput ullut qulit qaangiuppata ammaqqittussaavoq. Tamanna pissutigalugu angalaniartut nunatsinnut Danmarkimiit juunip ulluisa 15-iannit ”angalaniarnerminni peqquteqavinngikkaluarlutik” tikissinnaalerput – taamaalillutillu Namminersorlutik Oqartussanit akuersissuteqaqqaarnissaq pisariaqarunnaassalluni.
Angalasunut Kangerlussuarmi nutaanik suli malittarisassaqanngitsoq
Nunatsinnut angalasoqaqqilerneratigut coronavirusimik napparsimasunik tikittoqaqqinnissaa ilimanarluinnarpoq.
Mittarfeeqqamilu Kangerlussuartut ittumi inuit qanittuararsuusarput.
Kangerlussuarmi inuit imminnut tunillaassuunnissaata aarlerinarnera qanoq annikillisarniarpisiuk?
- Nutaanik malittarisassiortoqarpoq, piariivinngillalli, Nakorsaaneqarfimmi nakorsaq, Paneeraq Noahsen oqarpoq.
AAMMA ATUARUK Coronamik tunillatsissimasut marluk peqqissisut: Nunatsinni viruseqartoqanngilaq
Kangerlussuarmi coronamut misissortittoqarsinnaavoq, misissuinerilli Nuummut nassiuneqartassapput.
Angalasut mittarfimmi immikkoortinneqartarsinnaanissaat aamma periarfissaavoq - akitsuusigaanngitsunillu pisiarfeeraq mikeqigami angalasut imigassanik tupanillu pisiniaraangamik imminnut qanittuararsuusarput.
Kangerlussuarli coronamut atatillugu qanoq isumannaannerulersinneqassanersoq Kim Kielsenip Paneeraq Noahsenillu oqaasertalernianngilaat. Timmisartumut ilaasut ullut qulit qaangiuppata sapaatip-akunneranut 600-it tikittalersinnaapput, malittarisassalli nutaat "Coronalerisoqatigiinnit suli misissorneqartut", taakku oqaatigaat.
- Amerlasooriarluta oqaatigisarput innersuussutigiinnassavara: Eqitaarnani, imminut ungasinniarluni tikereernermilu angerlarsimaffimmit aninaveersaarluni, Kim Kielsen oqarpoq.
Siggunut assiaqut peqqikkaanni iluaqutaanngitsoq
Siggunnummi assiaqut? Danskit mittarfeqarfiini timmisartumut ilaasussat mittarfimmut isernerminnit angalajunnaarnissami tungaanut juunip ulluisa 15-iannit siggunnut assiaquteqartassapput.
Nunatsinnili taamaattoqarnavianngitsoq, Paneeraq Noahsen oqarpoq:
- Peqqikkaanni siggunut siaaqutit iluaqutaavallaarneq ajorput. Siunertarisamut naleqqutinngillat, nakorsaq oqarpoq.
AAMMA ATUARUK Covid-19: Arsaannermi GM nalorninartumiittoq
Nunatsinnut juuninp 15-annit angalaniartut aallannginnerminni coronamik tunillatsissimanatik uppernarsarsinnaassavaat. Misissortinnerat amerlanerpaamik ullunik tallimanik pisoqaassuseqassaaq. Aammattaaq Immersuiffissaq-Sumut immersorsimallugu uppernarsaammik mailimik takutitsisoqartassaaq.
Nunatsinnut tikinniariarluni ulluni tallimani angerlarsimaffimmi mattusimasoqartassaaq.
Tikinnermit ullut tallimat qaangiunneranni misissorteqqittoqassaaq, misissortinnerlu napparsimannginnermik takutitsippat aneqqusaannginneq atorunnaarsinneqartassalluni.
