Niels Saraluunniit? Kielsen naalakkersuisoqatissarsiornissaminut sapaatit akunnerannik periarfissaqarpoq

Partii Naleqqap Naalakkersuisunit sapaatit akunneri marluk matuma siorna tunuarnerata kingorna, naalakkersuisooqatigiinnik nutaanik pilersitsinissaq siunertaralugu isumaqatigiinniarnerit Kim Kielsenip tallimanngornermi ullaap tungaani aallartissavai.
Assi © : KNR
Allattoq Kenneth Elkjær
septembarip 20-at 2018 14:23
Nutserisoq Simon Uldum

Partii Naleqqap naalakkersuisooqatigiinnit tunuarneranit sapaatit akunneri marluk qaangiutilerput, Kim Kielsenillu naalakkersuisut ikinnerussuteqartut tamatuma kingorna siuttuuffigilerpai.

Amerlanerussuteqaleqqinnissarlu anguniarlugu isumaqatigiinniarnerit tallimanngornermi pisortatigoortumik aallartinneqassapput. Inuit Ataqatigiit Sara Olsvigilu nalunaaqutaq qulingiluanut kaffisoqatigiinnissamut aallarniutaasumillu oqaloqatigiinnissamut Siumumit qaaqquneqarput. Kingornalu, nalunaaqutaq aqqanermut, Demokraatit Niels Thomsenilu kaffisoqatigineqarlutik oqaloqatigineqassapput.

Taakku isumaqatigiinniarnissamut siunnersuutinik Siumumit nassinneqareerput, Kim Kielsenip Paamiut eqqaannut aavariarnerani isummerfigisinnaasaminnik.

- Kaffisoqatigiissaagut, oqaloqatigiissutigalugillu. Siunnersuutivut tigoreerpaat, partiip allattaa Mikael Petersen oqarpoq, isumaqatigiinniarnerillu siulliit pingaaruteqartupilussuusut aamma oqaatigaa.

AAMMA ATUARUK Partii Naleraq Naalakkersuisooqatigiinnit peqataajunnaartoq

Partiip naalakkersuisullu siulittaasuat Nuummut tallimanngornerup ullaavani tikereersimassaaq. Siumup siulittaasuata tullia, partiip allattaa Mikael Petersen, immaqalu aamma partiip ulluinnarni aqutsisuineersoq Kim Kielsenip isumaqatigiinniarnerni peqatigissavai.

Inatsisartunut qaammatit sisamat matuma siorna qinersisoqarnerata kingorna, naalakkersuisooqatigiinnik nutaanik kingullermik pilersitsiniartoqarmat aamma taakku peqatigai. Kim Kielsenilli Demokraatit Inuit Ataqatigiilluunniit taamani isumaqatigiissuteqarfiginngitsoorpai.

Isumaqatigiinniarnerit taamani piffissaligaanngillat. Kielsenilu tamatumuuna septembarip 28-utinnagu naammassereertariaqarpoq, Inatsisartut ukiaanerani ataatsimiinnerat ulloq taanna aallartissammat.

Partiip allattaata Mikael Petersenip ilisimatitsissutigaa, Kim Kielsen tulliani tallimanngorpat nallertinnagu naalakkersuisoqatigiinnik nutaanik pilersitsisinnaanngikkuni, Inatsisartunut qinersinissamik suaaruteqarsinnaasoq imaluunniit Sara Olsvigip naalakkersuisooqatigiinnik nutaanik pilersitsinissamut periarfississinnaagaa.