Kielsen akerliussutsimik takutitsisunut akissuteqartoq: 2022-nngortinnagu qinersisoqassanngilaq

Nipisattassiissutit pillugit suliaq annertuneruleraluttuinnarpoq. Nuummi akerliussutsimik takutitsisut hunnorujulikkaat ippassaq katersuupput, taakkulu qinersisoqarnissaa piumasaraat.
Kim Kielsenip akerliussutsimik takutitsisut Inatsisartut saanni ippassaq naapippai. Assi © : KNR / Malik Brøns
oktobarip 14-at 2020 11:03
Nutserisoq Connie Fontain

Akerliussutsimik takutitsisut hunnorujulikkaat Nuummi Inatsisartut silataanni ippassaq katersuupput. Taakku qinerserusuttut oqariartuutigineqarpoq.

Nipisattassiissutinut suliap annertusiartuinnarnera ilutigalugu ilorrisimaanngittoqaleriartorpoq.

Inatsisartuni illuatungiliuttut ataatsimoorlutik Naalakkersuisut siulittaasuannut, Kim Kielsenimut tatiginnikkunnaarlutik sisamanngormat nalunaaruteqarput. Tatiginninnginnermik taasisoqarnissaa amerlanerussuteqaqqalaartumik pinngitsoortinneqarpoq.

Nipisattassiissutinut suliaq pillugu naatsumik:

 

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.


Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.


Imartani Paamiut avannaaniit Kangerlussuaq tikillugu nipisanniarusuttunut nipisanniartoqarsinnaajunnaartoq, sapaatit akunneranni kingullermi nalunaarutigineqaraluarpoq.

 

IA: Kim attuumassuteqarpallaarpa?

Inuit Ataqatigiit suliaq pillugu avammut nalunaaruteqaqqaarput.


Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
 

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

 

Kukkunersiuinermut ataatsimiititaliaq sakkortuumik uparuaasoq

Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.

 

Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.

 

- Ataatsimiititaliap sakkortuumik uparuaavoq Inatsisartullu Naalakkersuisut siulittaasuata suliami matumani attuumassuteqarpallaarnissamut apeqqut eqqumaffigisimanngikkaa malugeqqullugu.

 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

Suliarlu Inatsisartut oqallittarfianni maanna oqallisigineqareerpoq, tamannalu akerliussutsimik takutitsisut Inatsisartut saanni torlulaartaaserlutik allagartarsualerlutillu katersuupput.

AAMMA ATUARUK Naalakkersuisunut akerliussutsimik takutitsineq: Qinersisa!

”Kim Kielsen naammaleqaatit”, taakku suaartarput.

Kielsenili qinersinissamik suaaruteqarnissamik eqqarsaateqarani KNR-imut oqarpoq. Aatsaallu qinigaaffiup qaangiunnerani qinersisoqassanerarlugu.

- 2022-mi. Taanna siunnerfigaarput, Kim Kielsen oqarpoq.

Akerliussutsimik takutitsisut umiatsiannik aalisartumut attartortitsinivit saniatigut nipisattassiissutinik qaffaaqataagavit attuumassuteqarpallaarsoraatsit. Tamanna ilumoorpa?

- Nipisattassiissutinut atatillugu aalajangiinera attatiinnarpara. Aalisartut 992-it sinnerlugit aalajangeeqataavunga. 204 tonsit siorna aalisarneqanngitsut ukioq mannamut nuunneqarput.

Taama imaappa attuumassuteqarpallaanngilit?

- Eqqartuusssissuserisup naliliinera naapertorlugu naamik. Attuumassuteqarpallaanngilanga, Kim Kielsen oqarpoq.

Nipisattassiissutit qaffanneqartut

Nipisattassiissutit qaffanneqarneranni suliaq tamarmi aallarnerneqarpoq.

Kim Kielsen pisassiissutinik qaffaanissamut ataatsimeeqataavoq – aamm naak angallatinik aalisartumut nipisanniartumut attartortissimagaluarlugu. 

Assi © : KNR / Malik Brøns

Inatsisartut saanni marlunngornermi ualikkut akerliussutsimik takutitsisut. Assi: Malik Brøns

 

Illuatungiliuttut Kim Kielsen attuumassuteqarpallaarsoraat. Aamma Kielsen paasissutissanik Kukkunersiuinermut ataatsimiititaliamut suliamik misissuisumut tunniussinaveersaarsimasoraat.

AAMMA ATUARUK Kim Kielsenimut tatiginnikkunnaarnissaq amerlanerussuteqaqqarluinnartut itigartikkaat

Naalakkersuisooqatigiit Kim Kielsen attuumassuteqarpallaarsimasorinngilaat. Naalakkersuisooqatigiillu Kim Kielsen suliamut atatillugu inatsisinik unioqqutitsisimanngissoraat.

Suliaq marloriarlugu misissorneqarpoq. Siullermik Naalakkersuisut nammineerlutik misissuisitsineranit eqqartuussissuserisut suliffeqarfiata, Poul Schmithip misissuiffigaa.  Eqqartuussissuserisut suliffeqarfiat naapertorlugu Kim Kielsen attuumassuteqarpallaarsinnaanermut malittarisassanik unioqqutitsilluni iliuuseqanngilaq.

Tamatuma kingorna Kukkunersiuisut ataatsimiititaliaat septembarip ulluisa arfineq-aappaanni piareertumik nalunaaruteqarput. Taannalu isornartorsiuineruvoq.

Ataatsimiititaliaq ”sakkortuumik uparuaallunilu” suliap ilai ”isornartortutut” taavai. Tamanna kukkunersiuinermut ataatsimiititaliap oqaaseqarsinnaanerani sakkortunerpaamik uparuaaneruvoq.

Allagaatit isertuussat tunniunneqassasut

Suliaq Inatsisartuni politikkikkut ippassaq sammineqaqqippoq. Kukkunersiuinermut ataatsimiititaliap suliami atatillugu allagaatit misissuinerminni pissarsiarisinnaanngisatik maanna tiguai. Misissuisoqarneranimi allagaatit takunnissinnaanermut periarfissaanngitsut ataatsimiititaliap ilisimatinneqarsimavoq.

Allagaatini qanoq allassimasoqarnersoq ilisimaneqanngilaq. Henrik Fleischerilli Aalisarnermut ataatsimiititaliami siulittaasup oqarnera naapertorlugu allagaatit marluk pineqarput. Allagaatip aappaa Naalakkersuisut nipisattassiissutinik qaffaaniarnermut allagaavoq. Allagaatip aappaa eqqartuussissuserisoqarfimmut Poul Schmithimut sumik misissuinissamut suliakkiinermut allagaavoq.

AAMMA ATUARUK Kukkunersiuinermut ataatsimiititaliap nipisattassiissutit pillugit allagaatit pissarsiarai

Kim Kielsen, akerliussutsimik takutitsisut attuumassuteqarpallaartutit kisimiillutik isumaqanngillat. Kukkunersiuinermut ataatsimiiititaliap suliaq aamma isornartorsiorpaa, illuatungiliuttullu politikkikkut kinguneqartitsisoqartariaqarsoraat. Suliaq ilinnut kinguneqartitsissutigineqassava?

- Naalakkersuisut allagaatinik takunnissinnaanermut inatsit malillugu sulipput. Arlaannillu sulinerup ilorrisimaarnannginneranik kinguneqartitsisoqarpat taava Inatsisartut suleriaasaanni naleqqussaasoqassaaq, Kim Kielsen oqarpoq.