Naalakkersuisunut akerliussutsimik takutitsineq: Qinersisa!
- Naammaleqaaq! Qinersisa!
Nuummi Amisut eqqaanni marlunngornermi nalunaaqutaq 16.15 taama suaartaattoqarpoq.
Inuit 100-it missaanniittut marlunngornermi ualikkut suaartaateqartut nutaamik qinersisoqarnissaa kissaatigaat.
Inatsisartuni suliaq akerliussutsimik takutitsisoqarnissaanut akunneq ataaseq sioqqullugu naammassineqarpoq.
Akerliussutsimik takutitsinissamut aaqqissuisut ilaata Naalakkersuisut siulittaasuat, Kim Kielsen nipisattassiissutinut tunngatillugu suliamut akooreersorli tatigiunnaarsimallugu oqaatigaa.
- Umiatsiani attartortippaa akilerneqarlunilu. Inatsinik allatuulli malinnittussaavoq, uanilu malinnissimanngitsoq isumaqarpunga, Stine Hammeken akerliussutsimik takutitsinnginnermi oqarpoq.
Akerliussutsimik takutitsisut Inatsisartut ataatsimiittarfiata eqqaanut politikerit anillallutik oqariartuutiminnik tusarnaarnissaat utaqqiartorpaat.
- Qinersisoqarnissaa piffissanngorsoraara. Naalakkersuisut naammaleqaat, Karlo Aminaq oqarpoq.
Illuatungiliuttut partiivinit Inuit Ataqatigiinnit, Partii Naleqqamit, Suleqatigiissitsisunit Atassummiillu siulittaasut siulliullutik anillapput. Taakku anillammata ersaattaattoqarlunilu nuannaartorpoq.
Naalakkersuisunut ilaasortat matukkut anillannerat pillugu taamaattoqanngilaq. Pingaartumik Naalakkersuisut siulittaasuat, Kim Kielsen (Siumut) anillanniariarluni akerliussutsimik takutitsisunit akerartuunneqarpoq.
”Kim Kielsen naammaleqaatit”, akerliussutimik takutitsisorpassuit akornannit suaartartoqarpoq.
- Aalisariutit atortillugu aningaasannassutigivat. Innuttaasut aningaasaataannit misissuisitsinissamut 180.000 koruunit atorpatit. Naammaleqaaq, aaqqissuisut suaartarput.
- Oqaluttuarisaanitsinni akerliussutsimik takutitsinerit annerpaat marluk siorna ingerlanneqarmata Naalakkersuisuni sulilluarnerulerniarlusi oqarpusi, oqariartuutigut tusaatissatut tiguinnarpasi. Timitaliigitsi!
Kim Kielsen annikitsumik oqaaseqaannartoq akerliussutsimik takutitsisut nipitunerunerannik nipaarutsinneqarpoq.
- Akisussaaffinnik qimarratiginninnianngilanga, tamanna eqqaamassavarsi, Kim Kielsen oqarpoq.
Naalakkersuisut siulittaasuata pisassiissutit ukiup siulianeersut 204 tonsit nuunneqarsimanerat nassuiaatiginiarsarigaluarpaa.
- Oqariartuutisi tiguakka tusarnaarlugillu, kisianni aamma oqarusuppunga, aap pisassiissutinik qaffaaqataavunga, aalajangiinermi ilaavunga, naggasiilluni oqarpoq.
Akerliussutsimik takutitsisut ilaata, Oline Steenholdtip Naalakkersuisuni taarserartoqarpallaarnera qatsuppaa.
- Kingullermik qinersisoqarneranit Naalakkersuisut taarseraannerat amerlavallaaqaat. Piffissap taama sivikitsigisup iluani taarseraannerit amerlanerat toqqissisimananngilaq. Nunatta siulittaasuata nipisattassiissutinut tunngatillugu iliuusai aamma akueriinnarsinnaanngilakka, Oline Steenholdt oqarpoq.
Akerliussutsimik takutitsisut akunnerup ataaseq qaangiuttoq unipput. Akerliussutsimik takutitsisoqarnissaanut aaqqissuussisup, Stine Hammekenip peqataajartortut tamarmik qujassuteqarfigai.
- Takkuttunut tamanut qujanaq, neriuppunga allannguisinnaassalluta. Kisianni Kim Kielsen ingerlaqqiinnarpoq soqutiginnippasinnanilu. Taama isikkoqarpoq. Atsiornernik katersivugut, aamma kingullermik taamaaliortoqarpoq, kisianni taanna soqutiginngilaat, Naalakkersuisunik taama aqutsisoqarsinnaanngilaq.
Corona pillugu malittarisassaqaraluartoq akerliussutsimik takutitsisoqartoq
Akerinnissamut inerteqquteqarneq akerliussutsimik takutitsisoqarnissaanut atuutinngilaq.
Corona pillugu malittarisassat ilitsersuutaanni ”allatut isummersornissamik siunertalinnut” atatillugu nassuiaateqarpoq.
”Isummersornissamik siunertalinnik” suliaqarnermi katersuunnissaq inerteqqutaanngilaq. Ilitsersuut naapertorlugu tamanna inuiaqatigiinnut tunngavoq – assersuutigalugu akerliussutimik takutitsinerit.
