Mittarfiit Kielsen aasaanerani ataatsimiigiaqqusinissamut piareertoq
Naalakkersuisut siulittaasuata taama nalunaaruteqarnera Nuummi, Ilulissani Qaqortumilu mittarfinnut pilersaarutinut Danmark milliadilikkaanik aningaasaliisinnaanersoq misissorniarnissaanut Lars Løkke Rasmussenilu isumaqatigiissuteqareernerata kingorna pivoq.
AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat
Misissuisoqarnissaani piffissaliussamut sunniuteqarnavianngilaq. Kielsenilli aningaasaatit akileraarutillu pillugit ataatsimiititaliap aasaanerani sulinngiffeqarnissaa taamaatippaa.
- Aningaasaqarnermut ataatsimiititaliap sulineranut piffissaanik ataatsimiititaliallu pisariaqartitaanut ataqqinnikkaluarlugu immikkoortumik suliaqarnerup sukkanerpaamik naammassineqarnissaa takorusuppara.
Kielsen oqarpoq itisiliillunilu:
- Tamannalu Inatsisartut aasap ingerlanerani immikkut ittumik ataatsimiinnissamut aggersarneqarnissaannik isumaqarpoq.
Kielsenip suliaq Inatsisartut Naalakkersuisunut mittarfinnik marlunnik tallileeqqusineratigut Qaqortumilu mittarfiliortitseqqusineratigut suliaq 2015-imili aallartissimanerarpaa.
Partii Nalerarli upernaaq ataatsimiinnermi misissuilluaqqusivoq, tassani Ilulissanut Nuummullu pilersaarutigineqartutut takitigitinnagit mittarfiit 2200 meterinik naannerutinneqaraluarpata kingunissaat misissorneqaqquaat.
AAMMA ATUARUK Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa
Tamatuma kingunitsianngua Kalaallit Airportsip sanaartornissanut nutaanut neqerooruteqartitsinissamik kinguartitsivoq, neqeroortitsinnginnerminnilu mittarfiit qanoq takitigissaneri erseqqissaatigitikkusuppaat.
Pilersaarut naapertorlugu Inatsisartut sanaartornissamut inatsit, mittarfinnik nutaanik sanaartorneqarnissaannut ingerlanneqarnissaannullu sinaakkusiisussaq aappassaaneertussaavaaq. Kielsenilli Simonsenillu tamanna allannguuteqarfigissallugu piareersimapput.
Inatsisissatut siunnersuutip aappassaaneerneqannginnerani aningaasaatit akileraarutillu pillugu ataatsimiititaliap, Hermann Berthelsenimit siulittaasuuffigineqartup oqallisigeqqaartussaavaa.
