Kiassuup sermersuup qeqqa siullerpaamik eqqaamasassamillu siallertileraa

Sermersuup qiterpasissua 2021-mi aggustiugaa siullerpaamik siallillarmaat inuiaat eqqamasassaannut ilannguppoq. Tamanna ima issitsigisaraluarpoq, taamaallaat nittaassinnaasarluni.

Siallernera nunarsuup ilatsiarsuani tusagassiutini allaaserisaasoq.

Siallernera piffissamik sermip aapiloorfianik malitseqarpoq.

Siallernerali oqaluttuami uani pingaartuunngilaq. Pisulliukua siallerneranut tunuliaqutaasut, GEUS-imi, tassa Danmarkimi nunatsinnilu nunap qanoq issusianik misissuisarfimmi ilisimatusartut taavalu Frankrigimi Schweizimilu ilisimatusaqataasa soqutiginartilluinnarsimagaat.

Tassami siallilersitsisumik sermersuullu aakkiartupiloorutaanik pisut uiguleriinnerannik kinguneqartumik kiarujussuarpoq.  

Sermeq nittartoq

Aputip ilaa sermersuup qaavaniittoq kiassuup sermersuatigoornerani aappoq.  

Apummillu iminnguuttut kuunnguunneranni aputip ataaniittoq sermeq taarnerusoq nuivoq. Tamannalu sermersuup aakkiatupiluulerneranik kinguneqarpoq.  

AAMMA ATUARUK Aatsaat taamak siallertigisoq: Juunimi juulimilu taamak siallertiginikuunngitsoq

Tassami aput qaqortoq seqerngup qinngornerinik avataarsuanut tarrarsuuttut utertitsisarpoq. Apullu aammat, sermeq apummit taarnerusoq apummiillu iminngortoq seqinermit kiammik tigooraanerulerput.

- Sialuk sermip aputillu aannerannut pissutaanngilaq. Apummit iminngortup apummik aatsitsilluni sermersuup qaavanik taarnerulersitsinera pissutaavoq. Kiassuaq sermersuup qaavani sumiiffinni arlalinni apummik aatsitsivoq, sermimillu apummit taarnerusumik nuisitsilluni, professori GEUS-imeersoq Jason Box tusagassiuutinut nalunaarummi oqarpoq.

- Sermersuarmi sumiiffinni arlalinni aput qalleq sermimut taarnerusumut illersuutaasoq kiarujussuarnerani aappoq.  

Taammattoqarsimanerali aamma ajunngitsortaqarpoq.

Aakkiartupiluulernerummi kingunerisaanik sermersuarmi allanngoriartornerit paasissaanngitsut qanoq, sumit qanorlu sukkatigisumik ilisimatusartunit paasiuminarninngortut GEUS ilisimatitsivoq. 

Aggusti 2021-mi aakkiartorneq

• Nalinginnaanngitsumik kiarujussuarmat sermersuup ilarujussuani siorna aggustimi siallermat sermersuaq aakkiartupiluulerpoq. Sialuinnarli aakkiartupiluulernermut pissutaanngilaq.
• Kiarujussuarnera sermersuup aakkiartortarneranik nalinginnaasumik aakkiartortarneranit sivisutitsineruvoq
• Sermersuarmi aggustimi ullut aputip masattarneri siorna marloriaatinngorput
• Kangerlussuarmi Watsonip kuua aatsaat taama sakkortutigisumik kuuppoq