Kiassarnermut aningaasartuutit oqorsaanikkut ikilisarneqarsinnaapput
Oqorsaanerit ussissaanerillu pitsaagaangata kiassarnermut ukiumut aningaasartuutit ikilisarput aamma gassinik silaannarmik kissakkiartortitsisartunik CO2-nik aniatitsineq millisarneqartarluni.
Kalaallit Nunaanni sanaartukkat sisamaagaangata pingasut sanaartornermut maleruaqqusanut 2006-imeersunut naapertuutinngitsumik suliaasarput. Piumasaqaataavormi kiffiutissat 22,5 centimeterinik issussuseqassasut - illulli ikinnerpaartaat ullumikkut taama suliaapput.
Jacob Poulsen Margrethe Sørensenilu Nuummi illuminni ukiunik 40-nik pisoqaassusilimmi oqorsaajuartariaqarput, kinguneqarluarneralu takusinnaalluarpaat. Jacob Poulsen ima oqarpoq.
- Maani aamma nunatsinni silaannaap kissannera pissutigalugu qisuit qumariartortaramik, taamaalillutik akunneqalerlutik, tamatigut tamaana ussiillisarlutik.
Jacob Poulsenili sanasutut ilinniarsimagallartilluni pisariaqalersillugu illup suliassartai suliarisarpai.
- Illu silataatungaatigut ilanikuuarput, iigai 50 procentimik issunerusunngorlugit. Aamma nutaanik salliligalersorparput, taamaalillugu illu oqornerujussuaanngortillugu, oqaluttuarpoq.
Iikkat attuinnarlugit siornatigornit nillinnginnerujussuusut malugisarpaat. Pingaartumik illup toqqaviata cementitaata illullu qisuttaasa naapiffiat nutaanik sallilikkersuinikkut apparnera ussinnerulersitsivoq.
- Aamma cementip iluani iikkap ilai ukiukkut sermertarmata cementi silataagut flamingomik oqorsaaseriarlugu qisummik iikkeqqinnikuuara, taannalu killigalugu kiileri sermissaartillugu kiannerulersipparput, nassuiaavoq.
Illuni ikkat qilaallu akorni aamma ussiikkajuttarput. Illumut ukiut 20-ngajaat matuma siornagut peqqaaramilli illup oqorsaasersortuarneranut 100.000 koruunit angullugit atorsimavaat.
- Iikkat qilaallu akorni aamma ussissarnikuuakka, kiammik atuinerput taamaalillugu millisarlugu. Jacob Poulsen oqarpoq.
Nunatsinni inissiat illullu aserfallassimasut 15 centimeterinik kiffiuteqalertillugit suliarinissaannut aningaasat 2,8 milliader koruunit pisariaqartinneqartut Namminersorlutik Oqartussat nalunaarusiaanni erserpoq.
Oqorsaanerinnaq CO2-p aniatitap ukiumut 16.500 tonsit missaannik milleriarnissaanik kinguneqassaaq, Kalaallit Nunaanni ukiumut CO2-p aniatitap tamarmiusup 2,4 procentingajaa.
