Katuami saqqummersitsineq kaffillernerlu
Saqqummersitsineq aggustip arfineq pingajuani aallartissaaq aggustillu 25-iata tungaanut Katuamut takuniarneqarsinnaassalluni. Saqqummersitsinerup nalaani Katuaq assilisarpassuarnik inissiarsuullu, ukiuni 45-ni illoqarfiit pingaarnersaanni pisunut assigiinngitsorpassuarnut qitiusimasup pisataanik ulikkaassaaq.
-Saqqummersitsinertut oqallissaarutitullu taavarput, saqqummersitsinermi aqqutigalugu inuiaqatigiit najugaqaqariaaserlu pillugit oqallitsitserusukkatta inuillu qanoq najugaqarnitsinnut najugaqaqatigiinnitsinnullu isummertikkusukkatsigit, Susanne Andreasen, saqqummersitsinermik aaqqissueqataasoq oqarpoq.
Aaqqissuisut ilagaat aamma Rikke Diemer, taanna 2011-mi apriilip qaammataaniilli Blok P-mik sammisaqarsimasoq, taannalu ima nassuiaavoq:
- Blok P pillugu paasisavut amerlaqaat isiginneriaatsillu nutaat puttussuutiinnavipput, inissiarsuullumi oqaluttuassartaata misissuiffiginerani nutaanik nassaartuinnavippugut.
Saqqummersitsineq 2014-ip aallartinnerani aamma Københavnimi Nordatlantens Bryggemi saqqummersinneqassaaq.
Aggustip arfineq pingajuanut pilersaarutit:
Nal. 16.00 John Peter Petrussenip saqqummersitsinerata ammaanersiornera, Inersuaaqqami.
Nal. 16.05 Filmip ”Blok P”- takutinnera, Inersuaaqqami.
Nal. 16.35-18.00 Saqqummersitsineq paarlersuarni ammarneqassaaq takkuttunullu kaffillertoqarlunilu kaagillertoqassaaq. Blok P pillugu nammineq oqaluttuaatigisat apersuisunut inuusuttunut sisamanut oqaluttuarineqarsinnaapput kiisalu aamma eqqumiitsuliortut saqqummersitsinermi peqataasut naapinneqarsinnaallutik.
Nal. 17.00-17.30 Filmip ”Blok P”-p takutinnera, Inersuaaqqami.