Katuami nalliuttorsiorluni tusarnaartitsineq

Nipilersoqatigiit tusarnaartitsiartorlutik angalaqatigeeqqaarnerat Katuami sulisunit aaqqissuunneqarsimavoq, maannalu Duo Arctica-mi nipilersortut ”angerlarlutik” nalliuttorsioriartussanngorput.

1996-imi aallartippoq, taamani Arnannguaq Gerstrøm Musikkonservatoriamut piareersaataasumik pikkorissartuulluni. Tassani Kirsten Beyer Karlshøj, pikkorissartitsisuusoq naapippaa. Nipilersortartut marluk imminnut tulluavissorsimapput, Duo Arcticamimi suleqatigiinnerat ukioq manna ukiunik 15-inngortorsiorneqarpoq.

-Nipilersornikkut suleqatigiinnerput ineriartorfiujuarsimavoq. Aallarteqqaaratta naligiippallaanngilagut, pattattartoq misilittagartooq qarlortartartorlu aallarterlaaq. Ullumikkulli naligiinnerulersimavugut, sulilu sungiusaraangatta ilarput ilinniarfigisarlutigu, Kirsten Beyer Karlshøj, Katuami arfininngorpat tusarnaartitsinissamut sungiusarnerminni unillatsiarnermini knr.gl-imut oqaluttuarpoq.

Nipilersortartut pikkorissorsuit marluk arfininngorpat unnukkut tusarnaartitsilerpata kammermusikkimik nipilersortoqassaaq. Schubertip, Bachip Chopinillu nipilersugassiaat pingasut, aammalu Arnannguaq Gerstrømip nipilersugassiaa nutaarluinnaq Katuami tusarnaartitsinermi siullerpaamik tusarnaartitsissutigineqassaaq. Tassani kalaallit kulturiat qilaat atorlugu kammermusikkimik nipilersornikkut ukiuni 100-linni ileqqutoqqanut akulerunneqassaaq. Nipilersuusiallu tusarnaarianut tusarnaartitsissutiginissaa nipilersoqatigiit qilanaarisupilussuuaat.

-Kalaallit Nunaanni tunuliaqutarisara klassiskimik nipilersornikkut tunuliaqutannut ataqatigiissinniarsarisimavara, nipilersuusiamalu tusarnaarianit ilassilluarneqarnissaa neriuutigaara. Kammermusikkimit nipilersortakkatsinnit allaanerulaarpoq, nipilersoriaatsilli taassuma iluani aamma nipilersugassianik nutaanik suliaqartoqartarpoq. Kirsten uattulli pikkusutsigimmat isumalluarpunga, Arnannguaq Gerstrøm naqissusiivoq.

Amerlasuut isumaqartarput tusanaartitsinermut klassiskimik nipilersorfiusumut tusarnaariassagaanni immikkut illuinnartunik piumasaqaatitaqartartoq, arfininngornermili tusaartitsisussat marluullutik tamanna isumaqatiginngilaat.

-Kammermusikki tusarnaartut qanillugit nipilersugassiaasarpoq, tusarnaartitsivissuarnilu nipilersuutit sakkortusarlugit nipilersugassaanani. Tusarnaariat misigissusaannut saaffiginnittuuvoq, pisariaqartorlu tassatuaavoq ammasuunissaq uummammillu ammasumik tusarnaarnissamut piumassuseqarnissaaq. Tamannarpiarlu anguniarlugu nipilersukkat suliaapput, Kirsten Beyer Karlshøj isumaqarpoq.

Katuami tusarnaartitsinissaq sioqqullugu Kirsten Beyer Karlshøj sungiusarnissaq kisiat siunertaralugu sapaatip akunnera Nunatsinniissimavoq. Nipilersoqatigiit sungiussilluarsimasussaapput, tamannalu sungiusartuarnikkuinnaq anguneqarsinnaavoq.

-Nipilersoqatigiinnissatta sungiusarnissaa pingaaruteqarpoq, taamaaliunngikkuttami nipilersornerput kissaatigisatsitut saqqummiussinnaanngilarput. Saqqummiussisartutut inuussuteqartut allat assingalugit sungiusartuartussaavugut, nipilersukkallu eqqortumik saqqummiunnissaa anguniarlugu immikkuualuttut uteqattaarlugit inissinniarneqartussaallutik. Klassiskimik nipilersortartuunermi nuannersut ilagaat, sungiusarnikkummi nipilersuut ataasiinnaatillugu annertunerulersinneqartarmat, Arnannguaq Gerstrøm oqarpoq.