Kattusseqatigiit Partiiat ikinnerusunik qinigassanngortitsivoq
Kattusseqatigiit Partiiannik pilersitsisoq Anthon Frederiksen partiip Ilulissani sapaatit akunnerata naanerani ataatsimeersuarnerani unammillerteqarani siulittaasutut qinigaaqqippoq. Partiilli Inatsisartunut qinigassanngortitai 2009-mi Inatsisartunut qinigassanngortitaanut 19-iusunut naleqqiullugit qulingiluaannaapput.
- Amerlanerusunik qinigassanngortitsinissatsinnut piareersarluarsimanngilagut, Anthon Frederiksen KNR.gl-imut oqarpoq.
Kisiannimi 2013-imi qinersisoqarniartoq nalunngereeraluarparsi?
- Ilumoorpoq aamma piareersimalluannginnerput siulersuisut akisussaaffigaat, Anthon Frederiksen oqarpoq.
Kattusseqatigiit Partiiat Ilulissani sapaatit akunnerata naanerani ataatsimeersuarput, tassanilu partiip qinersinissamut pingaartitassai aalajangersarneqarlutik.
- Meeqqat atuarfiata nukittorsaqqinneqarnissaa qineqqusaarutigaarput. Meeqqat atuarfianni ilinniartitsisut isumaginninnermut tunngasunik suliarisartagaat amerlavallaarsoraagut. Atuartitsineq isumagissavaat isumaginninnikkullu suliassat isumaginninnermi siunnersortinut suliassanngortillugit. Tamanna Ilulissani misilittagaqarfigilluarparput, Ilulissat kommunerisimasaani atuarfinni isumaginninnermi siunnersortinik atorfinitsitsiortornikuugatta, Anthon Frederiksen oqarpoq.
- Inuusuttut pitsaanngitsunik angusaqarlutik meeqqat atuarfiannit soraarummeertartut ilinniakkamillu aallartitsinngitsoortartut amerlavallaarput, oqarpoq.
Kattusseqatigiit Partiiat aamma erngup nukissiorfiisa nukimmik pilersitaasa sinnerisaata ilaatigut ujaqqerinermut atorneqalernissaa sulissutiginiarpaat.
Kattusseqatigiit Partiiata Inatsisartunut qinigassanngortitai tassaapput:
Ole Zeeb, Saqqaq
Katrine Tobiassen, Nuuk
Lars Johansen, Qasigiannguit
Karl Frederiksen, Nuuk
Angutinnguaq Heilmann, Nuuk
Villy Olsvig, Sisimiut
Aqqalu Schmidt, Sisimiut
Hans Dalager, Ilulissat
Anthon Frederiksen, Ilulissat