Kattuffik: Pineqaatissinneqarsimasunut inissiisarfinni nakkutilliisussaaleqineq ajornartorsiutaajunnaarpoq
Nuummi Pineqaatissinneqarsimasunut Inissiisarfiup sulisussat 40 procentii 2019-imi amigaatigai.
Inissiisarfik ulluinnarni suliassat isumaginiarlugit ilinniarsimanngitsunik sulisussarsisariaqartarsimavoq.
Pissutsit ullumikkut allaanerujussuupput. Atorfinitsitsiniarnermi ajornartorsiuteqarunnaarpoq Nuummilu Pineqaatissinneqarsimasunut Inissiisarfimmi nakkutilliisut 44-pput. 2019-imi 28-nnaallutik.
Parnaarussivinni sulisut kattuffiat Fængselsforbundet tusagassiorfinnut nalunaarummi taama allappoq.
Tamatumunnga pissutaavoq nakkutilliisut aningaasarsiaasa 2020-mi qaffanneqarsimanerat.
2020 sioqqullugu aningaasarsiat nallersuunnerat:
- Pineqaatissinneqarsimasunut nunatsinni inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusiaqarpoq.
- Danmarkimi parnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusiaqarpoq.
- Nikingassut 5400 koruuniuvoq.
- Nunatsinni nakkutilliisut sapaatit akunnerannut 40 tiimit sulisarput. Danmarkimilu nakkutilliisut sapaatit akunnerannut 37 tiimit sulisarlutik.
- Folketingimi amerlanerussuteqartut 2019-imi akuerisaannik nunatsinni nakkutilliisut tapisiaannik nalimmassaanissamik 2023-p tungaanut atuuttumik isumaqatigiissusiortoqarpoq. Nunatsinni nakkutilliisut taamaalillutik Københavnimi parnaarussivimmi nakkutilliisutulli akissarsiaqalerput.
- Aningaasat 2023 ilanngullugu akissarsianik qaffaataasut - nunatsinni nakkutilliisunut 38,4 millionit koruunit politiinullu 10,8 millionit koruunit - Atlantikup Avannaamiunut aningaasaliissutineersuupput.
Aallerfik: Pinerluttunik Isumaginnittoqarfik, inatsiseqarnermut ministereqarfik
- Aningaasarsiat qaffanneqarnerat 100 procentimik iluaqutaavoq. Nutaanik pitsaasunillu nakkutilliisoqalerpugut ilinniarsimasullu suleqatigut piginnarlutigit, sulisut sinniisaat Ikitannguaq Kruse Høiberg oqarpoq.
Aningaasarsiat qaffannissaannut katillugit 38,4 millioner koruuninik aningaasaliisoqarpoq – isumaqatigiissullu sioqqullugu Kalaallit Nunaanni akissaatit Danmarkiminngarnit ajornerujussuullutik.
- Ilaasortagut kalaallit ikiorniarlugit ilungersorsimaqaagut. Aningaasarsiakinneq pissutigalugu arlaqartut marlunnik suliffeqartariaqarsimapput, Bo Yde Sørensen, maanna Parnaarussivinni sulisut kattuffianni siulittaasuusoq, tusagassiorfinnut nalunaarummi oqarpoq.
Danmarkimi soraarninngorsimasut suliartortinneqartut
Nuummi Pinerluuteqarsimasunut Inissiisarfik siornatigut assoralisimaarsimaqaaq. Nunami siullersaalluni pinerlussimasunut navianarnerpaanut matoqqasumik immikkoortortaqarluni 2019-imi upernaakkut ammarpoq. Nakkutilliisussanilli atorfinitsitsiniarneq ajornartorsiutaasimaqaaq.
Danmarkiminngaanniit nakkutilliisut soraarninngorsimasut arfinillit Herstedvesterimilu nakkutilliisut tallimat taamaammat Nuuliartinneqarsimapput sulinissamut pilersaarummi putut inuttassaqanngitsut inuttalersorniarlugit.
AAMMA ATUARUK Kiisami: Pinerluuteqarsimasunut inissiisarfinni nakkutilliisut juullisiutissaqarlualersut
Ilaatigut ikiuukkiartortariaqarsimapput atorfeqartut ilarpassui taamaalinerani suli ilinniagaqarnerminnut atatillugu piffissap ilaani atuariartortartussaammata.
Nuummi inissiisarfimmi atorfeqartut 42-uusimapput. 1. novembari 2019-imi taakkunannga 20-t suli ilinniartuupput.
Ukiup tulliani juunimi pissutsit ilungersunarnerulerput. 1. juuni 2020-mi atorfeqartut 31-upput, taakkunannga 15-it ilinniartuullutik.
Napparsimalluni sulinngitsoornerit maanna ajornartorsiutaanerpaapput
Kalaallit Nunaanni Pinerluttunik isumaginnittoqarfik naapertorlugu Nuummi Pinerluuteqarsimasunut Inissiisarfimmi sulisut amerlassusissaat 49-nut inissinneqarsimavoq. Ulluinnarnilu sulisussanik amigaateqarnerujussuaq pissutaalluni inissiisarfimmi sulisut sinniisaata Taatsi J. Lyngep uippakajaarnini pissutigalugu napparsimasutut nalunaaruteqartariaqalersippaa.
Pitsaanerulersimanngilarli.
- Taamatut oqareerlunga Nuummi Pinerluuteqarsimasunut Inissiisarfimmi pissutsit nuannersuinnaanngillat, sulisut sinniisaat Ikitannguaq Kruse Høiberg oqarpoq.
- Napparsimalluni sulinngitsoornerit maanna initoqaat. Ulluinnnarni sulinitsinnut tamanna assoralisimaartitseqataavoq, tamannali Kalaallit Nunaanni Pinerluttunik Isumaginnittoqarfimmi kisimi atuutinngilaq. Tamanna ajoraluartumik inuiaqatigiinni ajornartorsiutaavoq.
