Kattuffiit Sermersuup ataatsimeeqatiginerani ataatsimiinneq qimaannaraat

Kattuffiit tallimaasut - AK, ASG, IMAK, NPK, PPK aamma SIK-p ataatsimoorlutik nalunaarutaanni tamanna erserpoq.

Killiffissiorluni ataatsimiinnertut taasaq, kattuffiit naapertorlugit sulisut 75-it soraarsitaanissaannut tunngatillugu suliap ingerlanneqarnerata pitsaassusaanik qularnaarinissamik siunertaqartoq ippassaq qimaannarneqarpoq.

AAMMA ATUARUK Sermersuup atorfiit 75-it atorunnaarsippai

Kommunip kattuffiillu ataatsimiittarnerminni naatsorsuutigisaasa assigiinngissuteqarnerat akerleralugu kattuffiit ataatsimiinneq qimaannarnerarpaat.
 
Ippassaq ataatsimeeqatigiinnermi Kommuneqarfik Sermersuup pisortaaneranit Steffen Ulrich-Lyngemit oqaatigineqarpoq ataatsimiinnerit pisortatigoortuunngitsumik pituttuinngitsumillu ingerlanneqassasut, aammalu sulisut kattuffiisa ataatsimiinnerni saqqummiunneqartut allatigut atorsinnaassanngikkaat.

AAMMA ATUARUK Inunnik isumaginninnermik suliallit sipaarniarnermi eqqugaassanngillat

Tamannali kommunip nammineerluni unioqqutittarsimagaa kattuffiit tallimaasut isumaqarput. Kommuni ilaatigut tusarniaanermi tusagassiutitigullu saqqummiussinermini sulisut kattuffiinik ataatsimeeqateqartarneq innersuussutigisarsimavaa, imatut isikkoqalersillugu, sulisut kattuffiisa sulisunik 75-inik soraarsitsinissami periuserineqarsimasoq akuersaaraat.
 
- Tamanna pissutigalugu ataatsimiinneq qimaannarparput, kattuffiit ataatsimoorlutik nalunaaruteqarlutik taama allapput.