Katsorsartikkiartortut Aalborgimukartalernissaat kissaatigaa
- Namminersorlutik Oqartussat 15 millionit koruuninik sipaaruteqassagaluarput, aamma napparsimmaviit immikkut suliaqartartut Jyllandip avannaaniittut suliaat annertusineqassagaluarput, Henning G. Jensen oqarpoq.
Nunatsinni peqqissutsimut aqutsisoqarfimmit aallartitanik Aalborgimi napparsimaveqarfimmut pulaartoqarsimanera aqutsisoqarfimmit uppernarsarneqarpoq.
- Ungasianit nakorsiartitsisarneq pillugu suleqatigiinneq annertunerusumik pillugu pulaarpugut, peqqissutsimut pitsaaliunermullu aqutsisoqarfimmi pisortaq, Kurt Nielsen, oqarpoq.
Taassuma erseqqissarpaa Københavnimi eqqaanilu napparsimmaviit akikinnerusunik akeqartitsillutik katsorsaasartut napparsimmaveqarfimmik suleqatigineqarnerat soqutineqarmat.
Napparsimasut Aalborgimi eqqaanilu napparsimmavinnut katsorsartikkiartortalissappata pisariaqartinneqartut arlaqarput,
Timmisartukkut toqqaannartumik attaveqalernissaq pisariaqassaaq, kalaallit katsorsartikkiartortut taakkualu ilaqutaasa inissaannik pisariaqartitsisoqassalluni, nutserisoqarneq nerisaqartinneqarnissaallu, maannakkut aaqqissuussineq ingerlanneqartoq assigalugu, pigineqartariaqarput, Kurt Nielsen oqarpoq.
- Aalajangersimasunik isumaqatigiissuteqartoqanngilaq, taamaattorli katsorsartittariaqartut ataasiakkaat Aalborgimi suliarineqarsinnaanerat eqqarsaatigineqarsinnaasoq, Kurt Nielsen oqarpoq.
Borgmester Henning G. Jensen Aalborgip mittarfeqarfiani siulersuisuini aamma siultitaasuusoq, KNR-imut oqarpoq, maannakkut timmisartortitseqatigiiffimmik Kangerlussuup Aalborgillu akornanni timmisartuussisinnaasumik misissuisoqartoq, tamannali pillugu annertunerusumik oqaaseqarsinnaannginnerarpoq.
Nuup Aalborgillu akornanni toqqaannartumik timmisartukkut attaveqalernissamik kissaateqarneq 2007-imili saqqummiunneqarpoq, taamani borgmesteriusoq, Agnethe Davidsen, Aalborgip Nuullu akornanni timmisartukkut toqqaannartumik attaveqalernissamik kissaateqarluni saqqummiussimmat.
Suliffeqarfeqarfiit attaveqatigiiffiata Grønland - Nordjyllandip 2009-mi misissuinermi paasivaa, timmisartuussisarnermi ilaasut 5000-it missaanik amerlassuseqartut ikippallaartut. Taamaakkaluartoq Jyllandip avannaamiut suli neriuuteqarput, aviisimi Nordjyske Tidendemi allapput.
