Katsi Kleist Nanook-ikkullu Kodamit akissarsisinneqartut

Kulturikkut Illorsuarmi Katuami unnussiuaarneq ingerlanneqarpoq. Nipilersortartugut pikkorissut tusarnaartartunit nipilersortartoqatiminnillu Imernalaaq Festivalertoqarnerani nalliuttorsiutigineqarput.

Ukioq kingulleq nersornaasissoqarnikuunngimmat ukioq 2013-imi saqqummersitani pitsaanerpaamik aamma toqqaapput. Tassanilu Katsi Kleist saqqummersitaa Qujanaq pillugu nersornaaserneqarpoq. 2014-imilu saqqummersitani pitsaanerpaatut qatanngutigiit Frederik Christian-ilu Elsnerikkut nipilersoqataallu Nanookikkut saqqummersitaat Pissaaneqaqisut pillugu nersornaaserneqarlutik.

Saqqummersitat taakku marluk erinniatigut, taalliatigut, kiisalu nipit nipilersuutillu ataatsimut katiterneqarneranni qafasinnerpaamik pitsaassusilittut nalilerneqarput, tusagassiutinut nalunaasummi taama allapput.

Aamma atuaruk Kodap nersornaasiuttagai pingasuusaraluartut marluinnanngussapput

Nersornaaserneqartut aamma 30.000 koruuninik nalilimmik checkimik tunineqarput.

Innersuunneqarsimasut allat ukuupput, 2013-imi saqqummersitani pitsaanerpaatut, Kali saqqummersitaa Nunasuup illuani pillugu Søren Alaufesenilu saqqummersitaa September pillugu. 2014-imilu saqqummersitani pitsaanerpaatut, Small Time Giants saqqummersitaat Stethoscope pillugu Kimialu saqqummersitaat Kimia pillugu.

Ukioq 2013-2014 isumalluarnartumut aamma nersornaasiisoqarpoq. Tassani Uyarakq (Aqqalu Engell) iTunesikkut saqqummersitaa Raatiu Nukik pillugu nersornaaserneqarpoq.

Koda Greenland ataqqinaammik aamma nersornaasiivoq, ”maligassiuisumut, erinniornikkut taalliornikkullu, nunatsinnilu nipilersornerup erinarsuusiornerullu silarluaani ataqqisarialimmik ingerlatsisimasumut”. Hiphopertartut Nuuk Posse, 1984-imi kalaallisut nuannarineqarluarlutik rappertalersimasut nersornaaserneqarlutik.

Isumalluarnartumut ataqqinaammillu nersornaasiinerit ukiut marlukkaarlugit ingerlanneqartarput, taakkulu aamma 30.000 koruuninik nalilimmik checkertaqarlutik.