Katersugaasivissualiornissaq ingerlalluarpoq
Eqqumiitsulianut nunatsinni katersugaasiviliorniarneq ingerlalluarpoq.
Suliaq aningaasartuutissanut inatsimmi ilanngunneqareerpoq, ukiumullu 200.000 koruuninik ukiuni sisamani tulliuttuni taperneqartassasoq akuersissutigineqareerluni.
Kalaallit ukioq 1900 tikillugu eqqumiitsuliaannut katersugaasivik inissaqartitsissaaq, aamma eqqumiitsulianut nutaanerusunut, assilialianut qalipakkanut, Issittumiit eqqumiitsulianut, Skandinaviap avannaarsuani saamit eqqumiitsuliaannut, danskit nunanilu avannarlermiut eqqumiitsuliaannut immikkoortortaqassalluni.
Katersugaasivissarli kiap titartassavaa? Illussanik titartaasartut saaffigeriikkat unammisinneqassapput, titartaasussaq taakku akornanni qinerneqassalluni. Katersugaasiviliorniarnermi siulersuisuni siulittaasoq, Bodil Kaalund oqarpoq. Tikkuarpaa, katersugaasivissamik titartaasussaq Issittumi pissutsinut ilisimasaqartuusariaqarmat. Katersugaasivissarsuup Nuummi inissisimanissaa pilersaarutaavoq, Nuutoqqami sissiukkamut qanittumi, Tupannguit isuatungaani. Katersugaasivimmiit Noorliit illorsuannut (Ilisimatusarfimmut)aqqusininngualiortoqassaaq. Ilimmarfiup naammassinissaata tungaanut. Aqqusininnguaq katersugaasivimmiit sissiukkap tungaanut atassaaq, Kalaallit Nunaata Katersugaasivia Toqqorsivialu tamaani inissisimapput.
