Karsi apriilimi imaarutissaaq
Partiit tamarmik Qaasuisup kommuniata aningaasaqarnera ernumagaat. Qilanaarutissaqarpallaarpasigatillu ullaaq ataatsimiillutik aallartipput.
– Apriilimi Qaasuitsup kommunia ooriutaarutereersimassaaq ullumikkutut pissutsit ingerlaannassappata naatsorsuutaagallartut aallaavigalugut, Timooq Mølgaard Atassummeersoq oqarpoq. -2009-mi aningaasanut nalimmassaasimanivut maanna 2010-mi suliareqqittariaqarpagut sippuisimagatta, taamaammat assiliaq 2009-mi suliarisarput 2010-mi aallaqqaataaneerlugu ingerlattariaqarparput, Bendt B Kristiansen Inuit Ataqatigiinneersoq oqarpoq. Demokraatit ilaasortaatitaat Ane Lone Bagger qangali ernumalerpoq:
- Decembarimili kommunit revisioniata takutimmassuk aningaasanik aqutsineq qanimut malinnaavigineqanngitsoq tamanna qasseriarluta aamma ullumikkut uparuarparput aningaasanik aqutsineq pitsaanerujussuusariaqartoq.
Borgmesterip Jess Svanep oqaatigisinnaannginnerarpaa karsi qanoq imaqarnersoq ullormiit ullormut imai nikerartarmata, kisianni:
- Massakkut sukannersumik ingerlatsinissamik siunniussaqarpugut sulilu eqiterinissamik aningaasanik aqutsinissamik akuerineqarnissatsinnut qinnuteqarluta, taannalu aningaasaqarnermut ataatsimiitsitaliap innersuussinera qujanartumik kommunalbestyrelsep akuerivaa, Jess Svane partiinit tamanik sukumiinerusumik ullormiit ullormut malinnaaneroqqullugu piumaffigineqarpoq oqarpoq.
