Karrat Kangerluani qaqqamit sisoortoqarsinnaaneranik naatsorsukkanik nutaanik saqqummiussisoqassaaq
Karrat Kangerluani qaqqamit sisoortoqaqqissagaluarpat eqqugaasinnaasunut naatsorsukkanik nutaanik Uummannami nunaqarfiilinilu angalaqatigiit Naalakkersuisut siulittaasuannit Mute B. Egede-mit siuttuuffigineqartumik saqqummiussiffigineqassapput. Angalaqatigiit aqagu ataasinngornermi 10 maj aallassapput.
Innuttaasunik ataatsimiisitsinerit ulluni makkunani piffissanilu ukunani imaapput:
Niaqornani: Marlunngorneq 11. maj nalunaaqutaq qulinut, 10:00
Qaarsuni: Marlunngorneq 11 maj nalunaaqutaq pingasut qeqqanut. 14:30
Ikerasammi: Pingasunngorneq 12 maj nalunaaqutaq aqqanermut, 11:00
Saattuni: Pingasunngorneq 12 maj nalunaaqutaq sisamat qeqqanut, 15:30
Uummannami: Innuttaasunut Illorsuarmiunut sisamanngorneq 13 maj nalunaaqutaq ataatsimut. 13:00
Uummannami: Innuttaasunut Nuugaatsiarmiunut 13 maj nalunaaqutaq sisamanut, 16:00
Uummannami: Innuttaasunut Uummannarmiunut sisamanngorneq 13 maj unnukkut arfineq pingasut qeqqanut 19:30
Ukkusissat: Tallimanngorneq 14 maj ullaakkut qulingiluanut 09:00
Kilde: Naalakkersuisut
Innuttaasunik ataatsimiititsinerit Niaqornani, Qaarsuni, Ikerasanni, Saattumi, Ukkusissani Uummannamilu pilersaarutaapput.
Ataatsimiititsinerit siulliit Niaqornani Qaarsunilu pissapput marlunngornermi.
Qaqqamit sisoortoqarsinnaaneranut atatillugu paasissutissat nutaat sunik imaqanersut, Naalakkersuisut tusagassiuutinut nalunaarutaanni ilanngunneqanngillat.
Taakkualu tusagassiuutitigut nalunaarutigineqassapput marlunngornermi maajip ulluisa aqqarnganni Niaqornani Qaarsunilu ataatsimiititsisoqareerpat, Naalakkesuisut tusagassiuutinut nalunaaruteqarlutik taama allapput.
Angalaqatigiit inuit amerlasuut paasissutissiissapput
Uummannami nunaqarfiinilu innuttaasunik ataatsimiititsisussat angalaqatigiit tassaapput, politikerit, atorfilllit, immikkullu ilisimasallit.
AAMMA ATUARUK Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
Naalakkersuisut siulittaasuata saniatigut Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund angalaqataassaaq, aamma Avannaata Kommuniani borgmesterinngortussaq Sakio Fleischer.
Taakkua saniatigut politimesteri Bjørn Bay aamma tarnit pissusaannik ilisimasallit marluk angalaqataassapput.
Qaqqap sisuffia
Karrat Kangerluani 2017-mi qaqqap sisunerata kingorna tassaarsuaqarmat Nuugaatsiaq aamma Illorsuit eqqugaapput.
Nuugaatsiami ilaqutariit pingasut angullu utoqqasaaq ajunaarput, illullu arlaqartut tassaarsuarmit imaanut nusunneqarput.
Taamanikkut naatsorsuisoqarmat qaqqaq annertooq sisusinnaasoq paasineqarpoq, nunaqarfinnilu innutaasunut ulorianartorsiortitsisinnaalluni.
Tamatuma kingunerisaanik nunaqarfinni innuttaasut Uummannamut Ilulissanullu nuutsinneqartariaqarlutik.
