Karrat kangerluanni ineqarnermut piumasaqaatit atorunnaarsinneqartut
Karrat kangerluanni najugallit illutik pigiinnarniarlugit qinnuteqaatigisinnaavaat, saniatigullu nuuffigerusutaminni ikiorneqarlutik inimik attartugassarsissunneqarsinnaassapput.
IA tunuliaqutaralugu Ineqarnermut, Attaveqatigiinermut Naalakkersuisoq Naaja Nathanielsen Sanaartornermullu ataatsimiititaliaq marlunngornermi ullaap tungaani tamanna pillugu ataatsimiipput.
Nunaqarfiillu pineqartut najugarisimagukkit matumani pineqartut tassaapput Niaqornat, Ukkusissat Ikerasak, Saattut, Qaarsut aammalu Uummannap ilaa.
AAMMA ATUARUK Naalakkersuisoq nunaqarfimmiunut: Utoqqatserpunga
Juunip ingerlanerani Avannaata Kommunianit nunaqarfinni pineqartuni innuttaasut attaveqarfigineqarput oqarfigineqarpullu illui Namminersorlutik Oqartussanit tiguarneqassasut inuttaalu illoqarfimmut allamut nuuppata illut tamakku isaterneqarumaartut, tassa matumani pineqarlutik innuttaasut illusinerminni pisortanit taarsigassarsisimasut.
Taamatulli innuttaasunut nalunaaruteqarneq kukkunerusoq kommunep Naalakkersuisullu nassuerutigaat innuttaasunullu utoqqatsissutigalugu.
Tamannalu Ineqarnermut, Attaveqatigiinermut Naalakkersuisup Naaja Nathanielsenip Sanaartornermullu ataatsimiititaliap marlunngornermi ullaap tungaani tamanut ammasumik ataatsimiinnerminni erseqqissaatigeqqippaat.
Najoqqutassiaq atorunnaarpoq
Pingaarnertulli oqariartuutigineqartoq tassaavoq, innuttaasut illuminnik annaasaqannginnissaat pillugu malittarisassiortoqassasoq, illortillu pigiinnaraluarlugu aammalu pisortanit taarsigassaqaraluarlutik sumiiffimmut allamut nuuffigerusussinnaasaminnut pigunik kommunemit ikiorneqarlutik inimik attartugassarsiuunneqarsinnaassasut.
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Tamannarpiarlu pillugu Naaja Nathanielsen ataatsimiititaliamut oqarpoq tamanna pillugu aningaasaliissutissanik Aningaasaqarnermut Akileraartarnermullu qinnuteqaatini juulip aappaani akuersissutigineqarsimasoq.
Taamaalillunilu periarfissaq taanna maanna ammaanneqarpoq. Tamannalu ilaatigut aamma isumaqarpoq aningaasanut atukkanut taarsersuinissaq taamaalilluni aamma unikaallatsinneqarsinnaalersoq.
Pisortanut taarsigassat atorunnaarsinneqarput
Innuttaasut aammattaaq toqqarsinnaavaat najukkami allami inimik attartugassaqalernerminni illortik naalakkersuisunut kommunalbestyrelsenulluunniit akisussaaffigineqalersissinnaassallugu.
Taamaaliorunillu, Naalakkersuisunit Avannaata kommuneaniluunniit kommunalbestyrelsenit innuttaasut pineqartut illumut akiligassaminnut isumakkeerfigineqarsinnaassapput.
Innuttaasullu pineqartut tassaapput sumiiffimmi qaqqat nakkaaratarsinnaanerannut aarlerinartorsiorfiusup eqqaani najullit.
aningaasallu attartukkat illuliornissamut tapiissutininngaanneersuusinnaapput, imminut illuliuunnerminngaanneersuusinnaapput aammalu illunut sanaqataaffiusuninngaanneersuusinnaallutik.
Taama ittoq periarfissaq ammaanneqarpat taava tamanna aamma isumaqarpoq, Namminersorlutik oqartussat inatsisaat naapertorlugit Namminersorlutik oqartussat piginnaatitaalissammat illunik isaterinissaminut, Naaja Nathanielsen oqarpoq.
Innuttaasummi bankimut attartugaat qanoq pineqassappat? taama Naaja Nathanielsenimut aperivoq Sanaartornermut ataatsimiititaliami ilaasortaq Kim Kielsen.
- Bankit namminersortuupput, taakkulu uagut susinnaanngilagut, bankit nammineq apeqqutaapput qanoq piniarnersut, Naaja Nathanielsen akivoq.
- Misissuinerup nutaap takutippaa, Karrat kangerluanni qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
