Karrani ulorianartoq: Nuukkusuttut suli nuunngitsut
Uummannap kangerluaniittumi Umiammakkut Qaqqaanni 2017-imi sisoorneqarneratulli aqagu immaqaluunniit aatsaat ukiut 200-t qangiuppata sisoortoqaqissinnaavoq, malerujussualimmik tassaarsuaqarluni.
Misissuinermi kingullermi paasisat, upernaaq manna saqqummiunneqartut, taamaapput.
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Taamaammat Uummannami nunaqarfinnilu arlalinni najugaqartut allamut nuunnissaannut pisortat ikiorusullugit nalunaarnikuupput.
Kisianni pisortat inissiamik ataatsimilluunnit suli neqeruunngillat.
- Ajorpoq, ajorpoq taamannak. Aarlerinarpallaaqaaq suli ikiorneqarnani, aarlerinartorsiorfimmiilluni annilaanganaqaaq, ernumarpoq. Sualummik utoqqasaanngorluni, sissallu qulinnguaniillunga ajorami, Qaarsormiu Bea Petersen, 67-inik ukiulik, KNR-mut oqarpoq.
Uummannamiit taassumalu eqqaani nunaqarfinniit nuukkusuttut maanna inuit 45-sut, Avannaata Kommunia KNR-mut allappoq.
Meerartaqartut
Tassaarsuaqaqqissinnaanissaanut qaammat kingulleq aarlerisaarinerup kingorna inuit 176-it nuunnissaminnik pisortanit periarfissinneqarput, tassalu taakkunannga 45-it, taakkunannga meeqqat 13-it, maannamut nuukkusupput.
Tassaassuaqaqqissinnaanissaalu qaammat kingulleq aarlerisaarutigineqalermat, Bea Petersenip illua sissami ulorianartorsiorfimmiimmat nuunnissamut ikioqquvoq.
Sulili ikiorneqanngilaq, tamannalu toqqissisimanarinngilaa.
- Tassaarsuaqarnissaa pillugu inissarsiortut inissittariaqaraluarpaatigut.
AAMMA ATUARUK Niaqornanit Qaarsuniillu qulit nuukkusuttut
Nuukkusullutik kissaateqartut siullermik Uummanniassapput, inissiiviugallartumullu pisortat akiligaannik inissinneqarallarlutik.
Taava nuuffissatut kissaatiminnut inissaqartinneqalerunik inimik attartugassaminnik neqeroorfigineqassapput.
Bea Petersenip ernini illoqarfeqatigerusullugu Nuummut nuukkusulluni nalunaarpoq.
Qaarsuni tassaarsuaqalissagaluarpat nilliasaat appittussaq Bea Petersenip igalaaq ammatinngikkaangamiuk suli tusaasinnaaneq ajorpaa.
