Karl Lyberthip aalisartut imaluunniit tunisasssiortut illersornerlugit?
Ullu alla oqaruni suliffissuit namminneq aalisartitsinermikkut sulisunik annaasaqarnavianngitsut, aqaguani oqassooq piginneqatigiiffiit angisuut pisassaannik ikilisaaviginiarnagit - sulisunik soraarsitsisoqaqinammat.
- Oqarfigivarma piginneqatigiiffiit tunisassiorfii imminut akilersinnaasumik ingerlasinnaanngitsut namminneq aalisarsinnaatitaanngikkunik. Isumaqarpunga taamatut isummerneq kukkunerusoq.
Piniarnermut aalisarnermullu naalakkersuisoq Radioaviisimut aggustip arfineq aappaanni taama oqarpoq. Aalisarnermik inuussutissarsiuteqartuunissamik piumasaqaatip atuutsilerseqqinneqarnissaa, piginneqatigiiffiit angisuut aalisarsinnaanerminnik tunissassiorfimminnilluunniit annaasaqartillugit, sulisunik annaasaqarfiunavianngitsoq. Taamani Lyberth-ip erseqqissarpaa, piginneqatigiiffiit tunisassiorfii aalisarsinnaajunnaartitaappata suliffissaarunnermik kinguneqarnavianngitsoq.
- Naamik, annilaangatiginngisaannarsimavara. Aalisartummi tamaaniipput, neriuppungalu aalisakkat suli amerlanerusut. Aalisakkat amerlassusaat taakkuuginnarput, suliffiit ikinnerulernerannik kinguneqarnavianngilaq.
Naalakkersuisoq taama oqarpoq. Ullut marluk qaangiutiinnartut Karl Lyberth-ip §37-i atorlugu apeqquteqaammut parteeqamminut aalisartumut piniartumullu Karl-Kristian Kruse-mut akissuteqarpoq. Kruse'p paaserusuppaa Lyberth pilersaaruteqarnersoq piginneqatigiiffiit tunisassiorfissuisa aalisarnerat killilerusunneraa, taakkumi angallateerarsortunut unammillertuummata.
Tamatumunnga Lyberth allakkatigut akissuteqarpoq:
- Ingerlatseqatigiiffiit ilaat pisassiissutinik pisiortorsimapput aalisarnermilu peqataallutik, tunisassiassaqartuarnissartik qulakkeerniarlugu. Pisassiissutit tunniunneqarsimasut atorunnaarsimasulli, aalisarnermi suliffissaqartitsinerpaaffiusuni atorneqarsinnaasunngorlugit naalakkersuisooqatigiit kissaateqarnerat taamaasiortoqarneratigut illuatungilersorneqassaaq.
SIK'p aamma Sulisitsisut Peqatigiiffiata suliffissuarni suliffinnik annaasaqaataasinnaanerinik aarlerinertik oqaatiginikuuaat, Karl Lyberth-ip tunisassiorfissuit tunitsiviutigalutik, tunisassiuutigalutillu aalisarsinnaaneri inerteqqutaalersippagit. Kisianni tassa suliffinnik annaasaqarnissaq pillugu naalakkersuisoq qanoq isumaqarnersoq paasiuminaappoq.
Aalisakkeriviit namminneq aalisartitsisinnaanerat Karl Lyberth-ip saassuteriarlugu, aqaguani illersulersarai.
Imaassinnaavoq tamanna pissutigalugu aalisarnermik inuussutissarsiuteqartuunissamik piumasaqaatip eqquteqqinneqarnissaanik Karl Lyberth-ip kalerrisaarutigisaralua aappaagu upernaami Inatsisartut ataatsimiinnissaannut kinguartinneqartoq.
