Karl Lyberth SIK-mit taperserneqarpoq
SIK-p siulittaasuata Karl Lyberthimut tapersiuteqarluni nalunaaruteqarnermini SIK-mut ilaasortat ilaqutaasalu, aalisakkeriviit tunisassiassaaleqillutik angerlartitsigaangata, ajornartorsiutigisartagaat erseqqissaatigai.
-Meeqqat angajoqqaatik isigaat suliffissuarmi suligaluarlutik ilaannikkut qaammaterpaaluit sulinngeriarlutik suliartoqqittartut. Taakku inersimasunngorunik suliffissuarmut suliartornissaminnut kajuminnerulernavianngillat, sulisartut angerlartitaasaqattaartarnerat pissutaalluni, Jess G. Berthelsen isumaqarpoq.
SIK isumaqarpoq qaammammoortumik pisassiissoqartalerneratigut kattuffiup ilaasortai ataavartumik sulisinnaalissasut, taamaattumillu aalisarnermut naalakkersuisoq Karl Lyberth isornartorsiorneqartaqisoq matumani taperserneqartoq.
- Siunissaq eqqarsaatigalugu pissutsillu tamakku pitsaanerusumik ataqatigiissaartumillu Naalakkersuisut siunnerfigsaat SIK-miik taperserparput. Isumaqarpugullu qaammatikkaartumik pisassiisoqartalerneratigut ilaasortagut ataavartumik suliffeqartinneqalissasut, tamannalu eqqunneqartariaqartoq piviusunngortinneqarlunilu, Jess G. Berthelsen oqarpoq.
