Karl Lyberth: Atorfinitsitsineq Aleqamut ilisimatitsissutigineqarpoq
Atorfinitsinneqarnerali Aleqa Hammondimut ilisimatitsissutigineqarsimasoq, Karl Lyberthip nammineq maanna oqaaatigaa:
- Tassa oqarpunga soqutigalugu atorfinitsinnissaa periarfissanut ilaasoq, kisianni tassa taanna nammineq akuliuffiginiarnagu oqaatigaa, Aalisarnermut Naalakkersuisuusimasoq, Inatsisartunilu maanna ilaasortaq, Karl Lyberth, Siumumeersoq, oqarpoq.
Tom Ostermanip Naalakkersuisumut siunnersortitut atorfinitsinneqarnera isornartorsiorneqangaatsiarnikuuvoq, qanigisamik atorfinitsitsinertut taaneqarluni, tassami Tom Ostermann Naalakkersuisut siulittaasuata Aleqa Hammondip aapparimmagu.
Naalakkersuisut siulittaasuata Aleqa Hammondip oqaatigisimasuuppagu aappami immikkut siunnersortitut atorfinitsinneqarnera pissusissamisuunngitsoq, taava qanoq pisoqarsimassagaluarpa? Apeqqut taanna Karl Lyberthimut ingerlateqqipparput, akivorlu:
- Nalilersuineq soorunami allaasimassajunarsigaluarpoq, kisianni maannakkut pereersut pereerput, taakku utertinneqarsinnaanngillat, Karl Lyberth oqarpoq.
Taassuma naalakkersuisutut sulinermini kukkussuteqarsimanini nammineq oqaatigalugu, naalakkersuisutut ukioq manna januaarip ulluisa arfernanni tunuarpoq:
- Kukkussutigaara uanga nammineq taanna, aamma kingunerisai maannakkut atorpakka. Tassa suliffik nuannarisupilussuusara uggornaraluartumik qimattariaqarpara kukkussuteqarsimanera pissutigalugu. Taannaannaanngilaq, aamma alla pisassiinermut tunngasoq aamma taanna kukkusoq uanga akisussaaffigalugu soorunami tiguara, taamaattumik atorfinninngaanniit nuannarisanninngaanniit tunuartariaqarsimavunga, Aalisarnermut, Piniarnermut Nunalerinermullu Naalakkersuisuusimasoq, Karl Lyberth, Siumumeersoq, oqarpoq.
Naalakkersuisut siulittaasuata Aleqa Hammondip, aappami Naalakkersuisumut immikkut siunnersortitut atorfinitsitsinneqaraluarneranut atatillugu AG-mit oqaaseqartinniarneqarsimagaluarpoq, suliamulli atatillugu oqaaseqaqqinniannginnini oqaatigisimallugu.
