Karl Lyberth: Ammasuunissaq pinngitsaaliissutigineqarli
Aap, taamaattariaqarpoq, aalisarnermut, piniarnermut nunalerinermullu naalakkersuisoq Karl Lyberth Siumumeersoq taama isumaqarpoq.
- Aningaasaqarnikkut soqutigisavut saqqummiuttarnissaat pinngitsaaliissutaasariaqarpoq, Karl Lyberth oqarpoq.
- Aaqqissuussineq sooq pinngitsaaliissutinngortinneqartariaqarsoraajuk?
- Inuiaqatigiinnut ammasuunissarput pingaaruteqarsoraara. Nammineq soqutigisavut pillugit innutaasut eqqoriaasaqqaaginnannginnissaat pingaaruteqarsoraara. Taamaaliornikkut eqqoriaanerit tunngavigalugit oqalunneq aamma pinngitsoortinneqarsinnaavoq, taamaammat isumaqarpunga ammasumik pissuseqartariaqartugut, aalisarnermut, piniarnermut nunalerinermullu naalakkersuisoq Karl Lyberth oqarpoq.
KNR-ip inatsisartunut ilaasortanik 31-iusunut attaveqarluni ammasuunissamik apeqqummut qanoq isumaqarnerinik misissuinerata kingorna taama isummerpoq.
Tassani erserpoq ilaasortat 25-it nammineq atorfigisatik aningaasatigullu soqutigisaqarfigisatik pillugit paasissutissanik tunniussissamaartut - ilarpassuilumi taamaalioreersimasut. Marluk akipput immaqa taamaaliussallutik, ilaasortarlu ataaseq akivoq taamaaliorniarnani, pisasullu apeqquteqaammut akissuteqarsimanngillat.
Politikerilli qinikkat sunut attuumassuteqarnerat namminerlu aningaasaqarnikkut soqutigisaqarfigisaat pillugit innuttaasut paasissutissanik pissarsinissaminnut periarfissaqarnerulertussanngorpasipput.
Radioaviisip Naalakkersuisunut ilaasortat sorliit Inatsisartunut ilaasortat assingalugit ammasuunissamik aaqqissuussinermut peqataaniarnersut sapaatit akunnerata matuma ingerlanerani tamakkiinerusumik saqqummiussinnaassallugu naatsorsuutigaa.
Naalakkersuisunut ilaasortat allat akissuteqarnissaat utaqqitillugu oqaluttuarisinnaavarput aalisarnermut, piniarnermut nunalerinermullu naalakkersuisup ammasumik ingerlatsiniarluni siunissimagaa.
- Immersugassaq immersoreerakku, taamaammat uanga isertugassaqanngilanga, Karl Lyberth Siumumeersoq oqarpoq.
