Karl Kristian Kruse isumasioqatigiinnissamut takkutinngitsoortoq
Nutartigaq:
Tallimanngornermi unnukkut nalunaaqutaq qulingiluanut qiteqqutoq:
Aalisarnermut naalakkersuisup Karl Kristian Krusep Aalisarnermut Ataatsimiititaliap isumaqatigiinnissaq pillugu aggersaaneranut ornigussimanersoq unnuk manna uppersisinnaasimanngilarput.
Aalisarnermut piniarnermullu ataatsimiititaliap aalisarnermut piniarnermullu naalakkersuisoq Karl Kristian Kruse ualimut nalunaaqutaq tallimanut isumasioqatiseraa.
Aalisarnermut Naalakkersuisoqarfiup pisortaata Jørgen Isak Olsenip aalisarnermullu ataatsimiitsitaliap siulittaasuata tullia Nivi Olsen KNR-imut tamanna uppernarsarpaat.
Naalakkersuisup Karl Kristian Krusep isumasioqatigiinnermi peqataasinnaannginnera Aalisarnermut Ataatsimiititaliaq ilisimatinneqarpoq, isumasioqatigiinnissarlu unnugu nalunaaqutaq arfineq-pingasunut qiteqqunnissaanut taamaammat kinguartinneqarpoq.
AAMMA ATUARUK Aalisarnermut inatsisip kingunerisinnaasai erseqqissarneqartariaqarput
KNR-ip paasisai naapertorlugit Aalisarnermut Naalakkersuisoqarfimmit assigiinngitsunik nalunaartoqartarnera isumasioqatiserinninnermut pissutaavoq, Aalisarnermut inatsisissatut siunnersuut nutaaq oqallisaaqisoq, Inatsisartullu ukiaanerani ataatsimiinnissaanni oqaluuserineqartussaq matumani qitiulluni.
Aalisarnermut inatsissaq pillugu tallimanngormat isumasioqatigiittoqarmat naalakkersuisoqarfimmi pisortaq Jørgen Isak Olsen oqarsimaneragaavoq inatsisissamut siunnersuummut akerliusut isumaqatigalugit.
AAMMA ATUARUK Inatsisissatut siunnersuut nangiarnarpallaarpoq
Taamaattuminguna ataatsimiititaliap Naalakkersuisoq ataatsimeeqatiserisimagaa. Ataatsimiititaliaq isumaqarpoq naalakkersuisoqarfimmi pisortap Naalakkersuisup politikkikkut siunniussanut toqqaannartumik akerliusumik iliortariaqanngitsoq.
Tamanna Naalakkersuisup akisussaaffigigaa ataatsimiititaliaq isumaqarpoq, maannalu suliaq pillugu akissuteqartoqarnissaa kissaatigalugu.
AAMMA ATUARUK Aalisarneq pillugu inatsisissatut siunnersuut akisusinnaasoq
Kilisaatinik kinguppannianit angisuunit aalisarnermut inatsisissaq nuannarineqanngeqaaq, ilaatigut pissutigalugu aalisarsinnaanermut allagartat naleqaqisut ullumimut naleqqiullugu inunnut amerlanerusunut agguaanneqarnissaat pissutigalugu.
Inatsisissami siunniunneqarpoq aalisarnerup iluani suliffiit amerlanerusut pilersinneqarnissaat, iluanaarutillu innuttaasunut amerlanernut tutsinneqarnissaat; inatsisissarli aamma nunap karsianut sulisitsisunullu akisussaqisoq, inatsisissatut siunnersuummi allassimavoq.
Ataasinngornermi nutartigaq.