Karl Eliassen Herstedvesterimiiginnassaaq
Immikkut paarisassanngortitaasimasoq, Karl Eliassen nunatsinnut nuunneqassasoq, Qaasuitsup Eqqartuussisoqarfiata qaammatit qulingiluat matuma siorna aalajangeraluarpaa.
Najukkami eqqartuussiviup aalajangigaa Nunatta Eqqartuussisuuneqarfiata tallimanngormat aallanngortippaa, Karl Eliassenilu, ukiuni 17-ini Herstedvesterimeereersoq, tassaniiginnartussanngorpoq. Politiini unnerluussisussaatitaasuneersoq, Robert Rafn taama paasissutissiivoq.
Najukkami eqqartuussiviup 2017-imi marsimi aalajangigaa unnerluussisussaatitaasunit aalajangeqqitassanngortinneqarpoq.
AAMMA ATUARUK Karl Eliassen Nunatsinni inissiisarfimmiilissanersoq aalajangerneqartussanngortoq
Karl Eliassenip inuiaqatigiinnut akuutileqqinnissaa anguniarlugu nunatsinni inissiisarfimmut nuunneqarnissaa Qaasuitsup Eqqartuussisoqarfiata taamani aalajangerpaa.
- Immikkut paarisassanngortitaanermik pineqaatissiissutip maanna atuuttup atatiinnarnissaa unnerluussisussaatitaasut nunap eqqartuussisuuneqarfiani najukkamilu eqqartuussivimmi piumasaqaatigaat. Kalaallit Nunaannut nuutsitsinissamik aalajangerneq najukkami eqqartuussivimmit aalajangerneqarsinnaanngitsoq, Karl Eliassen suli ulorianartuusoq ulorianarunnaarnissaatalu tungaanut immikkut paarineqaannassasoq isumaqarpugut.
- Herstedvesterimi pinerluttunik isumaginnittoqarfiup oqaaserisai kingulliit, immikkut paarisassanngortitaanermik pineqaatissiissutip maanna atuuttup atatiinnarnissaanik inassuteqartut, taamaalilluta tapersersorpagut, Robert Rafn, nunatta eqqartuussisuuneqarfianit tallimanngormat taperserneqartoq oqarpoq, nangillunilu.
- Herstedvesterimi immikkut paarisassanngortitaanermik pineqaatissiissutip atatiinnarnissaa pinerluttunik isumaginnittoqarfiup inassutigaa, tamannalu tunngavilersuutigaarput. Unnerluussisussaatitaasut suliani ima ittuni pinerluttunik isumaginnittoqarfiup, tamatumalu ataani ilinniarsimallutik sulisut isertitanik ulluinnarni ilagisaqartartut, oqaaserisaannik tunngavilersuuteqarneq aallaavigisarpaat, Robert Rafn KNR-imut oqarpoq.
Karl Eliassen inooqamminut politiinullu siorasaarisimasutut toqutseriarsimasutullu tillinniarsimasutullu 2001-imi eqqartuunneqarpoq. Pinngitsaaliisimasutut nakuusersimasutullu siornatigut pillagaareernikuuvoq. Karl Eliassenip killiligaanngitsumik pineqaatissinneqarnini pillugu ukiut marluk qaangiuppata inerniliiffigineqaqqikkumasinnaavoq.
Karl Eliassenip pinerluuteqarnermi kingorna nunatsinni paarineqarusulluni 2005-imi siullermik misilikkaluarpaa.
AAMMA ATUARUK 47-årig skal blive i forvaring i Herstedvester