Karen Ellemann: Nunat Avannarliit Siunnersuisoqatigiinni allaffisortoqarpallaaqaaq

Taamaattumik Nunat Avannarliit suleqatigiinnerat iluarsartuunneqaqqittariaqartoq, Qallunaat Nunaanni politikeri Venstre-neersoq, Karen Ellemann isumaqarpoq, taanna peqatigiiffimmi, Norden i Danmarkimi siulittaasuuvoq Nunani Avannarlerni Siunnersuisoqatigiinnilu maanna ilaasortaalluni. Taanna isumaqarpoq Nunat Avannarliit Siunnersuisoqatigiinni angusarisartakkat annikippallaalersimasut.

- Taamaattumiguna Siunnersuisoqatigiit aaqqissuussaaqqinneqarnissaat ujartoriga isumaqarama, Nunat aallartitaasut Inatsisartuisa ataatsimiisitaliaanni partiit ilaasortaatitaat peqataanerusariaqartut.

Tassa Karen Ellemannip kissaatingigaluarpaa, Nunat Avannarliit Siunnersuisoqatigiivisa ataatsimiinneranni, Nunat naalagaaffiit tallimaasut Namminersorlutillu Oqartussaqarfittut pineqartartut Inatisartuini partiit oqaaseqartartui tamarluinnarmik aallartinneqarlutik ataatsimiinnermi peqataasarnissaat, assersuutitut taallugu, ilinniagaqarneq pillugu oqaaseqartartut ilinniartitaaneq pillugu sammisanut peqataatinneqartarlutik.

- Nunat Avannarliit Siunnersuisoqatigiit ataatsimiisitalianni allaffissornerujussuaq atugaavallaaqaaq politikkikkut oqariartuutinik imaqarpiarani, Venstre-neersoq Karen Ellemann oqarpoq.

Nunat Avannarliit Siunnersuisoqatigiivisa ataatsimiinnerannut peqataasunut ilaasut, Naalakkersuisunut ilaasortaq, Nick Nielsen, Siumut aamma Inatsisartunut ilaasortaq, Juliane Henningsen, Inuit Ataqatigiit, Oqalliffimmi nalunaaqutaq qulinut aallatittussami oqallisissapput ilaatigut eqqartorneqassalluni Nunatta ilaasortaanerata suna iluaqutigineraa. Apollo Jeremiassen oqallinnermi apersuisuussaaq.