Karen Ellemann: Inassuteqarnissaq neriuutigaara
Immap sikuata Nunatta eqqaani Issittumilu allami minnerulerneratigut, immakkut angallavigineqarsinnaasut nutaat periarfissaalerput, taamaattorli tamatuma kinguneranik Issittumi avatangiisini sunnertiaqisuni immamilu ajutoortoqarsinnaanera qaninnerulerluni.
Taamaattumik allanngoriartornerup tamatuma kingunerisinnaasai paasineqartariaqarput, taamaattumik nunat Issittumut sineriallit avatangiisinut ministeriisa - Danmarkimi avatangiisinut ministeri Karen Ellemann qaaqqusisoralugu - ulluni tulliuttuni Ilulissani ataatsimiinnerminni oqaluuserissavaat.
- Ataatsimiinnerup avatangiisit illersorneqarnerulernerannik kinguneqarnissaa neriuutigaara. Issittumut atatillugu immami uumassusilinnut uumasunullu allanut immikkut isiginiarneqartariaqartunut tikkuaasoqarnissaa siunertaraara, soorlu umiarsuarsuit takornariartaatit aalajangersimasumik ingerlaartarfeqalernissaat inassutigineqarluni. Ungasinnerusoq isigalugu takorloorsinnaavara, umiarsuit imermik atoriikkaminnik uuliakumillu sumi imaarsisinnaanerannik inassuteqartoqassasoq, Karen Ellemann Ilulissani ataatsimiinnissaq sioqqullugu Berlingske Tidendemut oqarpoq.
- Takornarianik angallassinerulerneq ilaatigullu nioqqutissanik assartuinermi aqqutit nutaat nunanut issittuniittunut nuannaarutaallutillu iluaqutaassapput, taamaattorli angallavigineqartoq aamma ataqqineqartariaqarpoq, Karen Ellemann aviisimut oqarpoq.
Taassuma ilanngullugu oqaatigaa, Mexicop Kangerliumanersuani uuliasiornermi ajutoorneq Nunatta sineriaata avataani misissuilluni qillerinissanut unitsitsinermik kinguneqartariaqanngitsoq.
- Mexicop Kangerliumanersuani ajutoornermi paasisat maanna utaqqimaaqqaartariaqarpavut, tamatuma uuliasiorluni qillerinernut qanoq kinguneqarnissaa aalajangiiffigitinnagu, Karen Ellemann DR-imut oqarpoq.
