Karen Ellemann akisussaaffimminik qimarratiginnippoq
Avatangiisit pillugit Radikalit oqaaseqartartuata, Johs. Poulsenip, tamanna erseqqissarpaa. Socialdemokratit SF-ilu peqatigalugit tamanna naalakkersuisunut saqqummiunniarpaa, akisussaaffillu tamanna tigoqqullugu kajumissaarniarlugit.
Issittumi avatangiisinut ministerit Danmarkimi avatangiisinut ministerip, Karen Ellemannip, Ilulissani sapaatip akunnerani kingullermi ataatsimeeqatigereerlugit Issittumi sinerissap avataani uuliamik qillerinerit nammineq akisussaaffiginagit erseqqissaatigereeraalu kajumissaarut taanna takkuppoq.
Radikalineersorli Johs. Poulsen isumaqarpoq, avatangiisit pillugit akisussaaffeqarnini Danmarkip akuersaartariaqaraa.
- Arlaannik ajutoortoqassagaluarpat nunarsuaq tamakkerlugu imartanut Danmark akisussaasuuvoq. Avatangiisinut ministerip naalakkersuisullu sinnerisa tamanna qimarratigisinnaanngilaat, Johs. Poulsen atuagassiamut Ingeniørenimut oqarpoq.
SF-imi avatangiisit pillugit oqaaseqartartoq Ida Auken isumaqataavoq:
Danmarkimi avatangiisinut ministeri akisussaaffimminik qimarratiginnimmat tupinnaqaaq, oqarpoq.
Socialdemokratit avatangiisit pillugit oqaaseqartartuat, Mette Gjerskov, aamma ernumavoq:
- Karen Ellemann ingerlaannarlunga ullumi nassuiaateqaqqussavara. Kalaallit Nunaanni avatangiisinut ministeri taassuma attaveqarfigisariaqarpaa, susoqarnersoq, aamma uuliamik misiliilluni qillerinissamut sooq akuersisoqarnersoq, paasiniaqqissaarlugu, Mette Gjerskov atuagassiamut Ingeniørenimut oqarpoq.
