Kapitinnerit kigutinillu misissuineq: Peqqinnissaqarfiup suliarisartakkani ammaqqikkai
Coronap ajornartorsiortitsinera nakorsanut peqqissaasunullu ulapitsitsivoq.
Napparsimasut nukinginnartut napparsimasullu qaammaterpassuarni utaqqisinnaanngitsutut nalilerneqarsimasut katsorsarneqarput – allallu utaqqisariaqarsimallutik.
Napparsimmavimmili suliaqarnerit allat maanna ammaqqikkiartuaarneqalerput. Matumani piffinni passunneqarsinnaasut – tassa napparsimasut sulisulluunniit angalaffigisariaqanngisaat aallarniutigineqassapput.
Taakku tassaapput:
- Akiuussutissanik kapuisarnerit
- Meeqqanik misissuisarnerit
- Inooriaatsimik misissuinerit
- Ataavartumik nappaatilinnut nakkutilliinerit malitseqartitsinerillu
- Kigutilerineq kigutinillu misissuinerit
- Napparsimavimmi unitsitsinani nakorsaanerit
- Pilatsitsinerit pilersaarutigineqareersut
- Nukittorsaaqqinneq
- Peqqinnissaqarfimmi pisariaqanngitsumik utaqqisut amerlipiloornissaat pinaveersaarnissaat pingaaruteqarpoq. Sulianik amerliartortitsineq innuttaasup peqqissusaa ataatsimullu isigalugu inuiaqatigiittut peqqissuseq qulakkeerniarlugu pivoq, peqqinnissamut naalakkersuisoq, Martha Abelsen (S) oqarpoq
AAMMA ATUARUK WHO: Pujortartartut coronaviruseqalersimasut perululernissamut qaninnerugunarput
Naak nunarput annikitsukkaartumik ammaqqikkiartoraluartut suli innersuussuterpaaloqarpoq – assersuutigalugu qanillinaveersaarneq eqqiluisaarnerlu.
Taamaammat:
- Sapinngisamik qarasaasiakkut nakorsisartitsisarneq (telemedicin) atorneqassasoq, oqarasuaataammalu Skype aqqutigalugit nakorsiarneq
- COVID-19-ip ersiutaannut assingusunik nappaateqartoqarpat imaluunniit coronavirusimik tunillatsissimasorineqartoqarpat nammineerluni takkuttoqartassanngitsoq inassutigineqarpoq
- Inini utaqqisarfinni, kaffisortarfinni ataatsimiittarfinnilu inuit amerlassusaannik killilersuineq suli atuutissasoq
- Napparsimasunut pulaartut ilaginnittullu tungaasigut sukangasumik killilersuineq suli atuutissasoq
Suliassat innuttaasup peqqissusaanut, piginnaassusaanut, inuunerata pitsaassusaanut sulisinnaassusaanulluunniit toqqaannartumik pingaarutilimmillu sunniuteqanngitsut suli pingaartinneqanngitsut, Namminersorlutik Oqartussat paasissutissiipput.
Tamatumani inuit imminnut qanillinaveersaarnikkut nappaatip siaruaannginnissaanik anguniagaqarneq pissutaavoq.