Kapisillit tunisaanerat annertugisassaanngitsoq
Inuussutissarsiutigalugu aalisartut tunitsivinnut kapisilinnik tunisisinnaanerat Naalakkersuisunit oktobarip qulingiluaani aalajangiiffigineqaraluarpoq.
Qeqertarsuatsiaanili aalisakkerivik kisiartaalluni kapisilinnik naammaginartumik maannamut tunisiffigineqarsimavoq.
Kapisilinnik tonsimik ataatsimik oktobarip aqqarngata kingorna tunisisoqarsimasoq, tunitsivimmi sulisut pisortaat Tobias Motzfeldt Royal Greenlandip nittartagaanut taama oqarpoq.
Sumiiffinni allani tunisat annertutigisassaanngillat. Assersuutigalugu Atammimmi sapaatit-akunnerata siuliani kapisilinnik 22 kiiluinnarnik tunisisoqarsimavoq.
Aammattaaq Maniitsumi Kangaamiunilu aalisakkerivinnut kapisilinnik tunisat annertugisassaanngillat. Royal Greenlandillu Nuummi aalisakkerivianut kapisilinnik tunisisoqarsimanngilaq.
Maannamut tunisat katillugit tonsip aappaa avillugu oqimaassuseqarput. Taamaalilluni Royal Greenlandip ukiormanna kapisilinnik tonsinik 15-inik pisiarerusutai suli ungasipput.
- Kapisillit tunitsivinnut tunisaasinnaalernerisa kingusinaarunneqarnerata kingunerisaanik tunisat ikitsuinnaanerannut pissutaavoq, Royal Greenlandimi tunisassiorfinnik ingerlatsinermi ingerlatsisoq Møller Lyberth nassuiaavoq.
Kapisilinniarneq aggustip 15-iani aallartippoq oktobarillu 31-anut killeqarluni, imaluunniit pisassiissutigineqartut 45 tonsiusut tamakkerneqarnissaasa tungaanut.
