KANUKOKA: Palle soqutigittaappallaaqaaq
Palle Christiansenip immikkut atuartitsisarneq pillugu ippassaq radioaviisimut oqaaseqaatai KANUKOKAp siulittaasuata tupaallaatigai, isumaqarlunilu Naalakkersuisup oqaasii appasittut soqutigisaqanngitsuusullu.
- Palle Christiansen oqaasiinut tupaallattupilussuuvunga, isumaqaraluarama Palle Christiansenilu naapittarnigut kingullerni ataatsimiittarnitsinni assigiimmik paasinneqatigiittumik killiffeqarluta. Kisianni isiginninnera tupaallaatigisorujussuuara taama appasitsigisumik taamallu soqutigisaqanngitsigisumik oqaaseqarsinnaammat, KANUKOKAp siulittaasua Martha Abelsen oqarpoq.
Suliassaqarfiullu kommuninut nuunneqarnissaa kommunit tungaanniit qangali piareersimaffigineqartoq Martha Abelsenip taakkartorpaa. Palle Christiansenillu ippassaq saqqummiuppaa immikkut atuartitsisarneq pillugu aqutsineq Namminersorlutik Oqartussaniit kommuninut nuunneqarpat aningaasat annikinnerusut atorneqalissasut, illuatungaanili Martha Abelsenip assortorpaa:
- Takutinneqareerpoq aamma kommunit ataasiakkaat misiliutaasumik tigusinerminni allaat tunniunneqarsinnaasut qaangerlugit pisariaqartitsisoqartoq takoreerparput. Taamaattumillu kommunit misiliutimik suliassamik tigusinik suli amerlanernik allatut ajornartumik atuisariaqartarsimapput, pisariaqartitsisut amerlangaarmata, Martha Abelsen oqarpoq.
Maannakkumut Namminersorlutik Oqartussat Kommunillu suliassaq ingerlateqqinneqarnissaanut isumaqatigiinniuteqarput. Namminersorlutillu Oqartussat isumaqatigiinniarnerni suliassaqarfik annertusiniarpaat, meeqqat ukioqanngitsuniit 18-inik ukioqalertussat tungaanut sullinneqartarnissaannik oqariartuuteqarlutik, taamaasiornerlu aningaasanik malitseqartariaqarpoq, Martha Abelsen oqarpoq:
- Soorunalimi taamatut oqariartuuteqarunik, aamma annertusissutaat aningaasanik naleqartariaqarpoq, Martha Abelsen oqarpoq.
Palle Christiansen ippassaq oqarpoq ilinniartitsisut sukannernerusumik atuartitsineq ingerlattalissagaat, taama iliortoqarpat immikkut atuartitat ikilisarneqarsinnaanerat taakkartorlugu. Aamma taamatut oqarnera Martha Abelsenip assortorpaa oqarlunilu:
- Palle Christiansenip naammanngitsumik tunngavissaqarnerarlugit aalajangiisoqartarsimaneratut ilimagisaa tassa ilinniartitsisut meeraq immikkut atuartinneqarnissaa innersuuppassuk, aatsaat tarnit pissusaannik ilisimasalimmit nalilersorneqaqqaartussaavoq tarnillu pissusaannik ilisimasallit Palle Christiansenip suliassaqarfiata ataanniittuupput. Aatsaallu tamanna anguneqareerpat immikkut atuartitaasinnaaneq aalajangerneqartarpoq, Martha Abelsen oqarpoq.
