Kanukoka: Iliuuseqartoqartariaqarpoq
Kommunit kattussuunneqarnerat ilutigalugu kommunit ataasiakkaat aningaasarsiorluarnerulernissaat neriuutigineqarsimagaluarpoq, kommunilli 2009-mi aaqqissuuteqqinneqarnerisa kingorna tamanna piviusunngorsimanngilaq.
KANUKOKA-p Qaqortumi isumasioqatigiisitsinerani ilaatigut tamanna sammineqartussaavoq.
Kommunit aningaasaqarniarnerat, Kanukokap siulersuisuinit ataatsimiinnerup ippassaq ammarneqarnerani misissorneqarput, kommunillu aningaasaliivigineqarnissaat pillugu Namminersorlutik Oqartussat ullumi aqagulu ataatsimeeqatigineqarnissaanni, kommunit ataatsimoorlutik piumasaqaateqarnissartik isumaqatigiissutigaat.
Kanukokap siulittaasua Martha Abelsen ima oqarpoq:
- Akileraaruserinerit akiliisitsiniartarnerillu qitiusumit aqunneqarnissaannik qanga aalajangertoqarpoq. Pisortanut akiitsut ataatsimut isigalugit ikilisinneqarnissaat taamanikkut anguniagaavoq. Akiitsulli amerliartuinnartut ullumikkut takusinnaavarput. Taamaammat allanngusoqartariaqartoq, ippassaq ataatsimiinnitsinni inernerivarput, Martha Abelsen oqarpoq.
Akileraarutit kommunini tamani assigiinnissaat, Akileraartarnermut Atugarissaarnermullu Ataatsimiitiliarsuup innersuussutigaa. Akileraarutit kommuninit aamma qaffanneqarsinnaanatillu appartinneqarsinnaassanngillat. Innersuussutigineqartullu taakku aamma oqallisigineqarnissaat pilersaarutaavoq.
Ataatsimiititaliarsuup innersuussutai kommuninit qanoq isumaqarfigineqarnersut, Martha Abelsenip oqaatigisinnaanngikkallarpaa, akileraarutissiisarnerli pillugu Namminersorlutik Oqartussat oqaloqatigineqarnissaat pingaaruteqartinnerarlugu:
- Kommuninut pingaaruteqartorujussuuvoq, oqallisigineqartorujussuullunilu. Aaqqinniagassalli aaqqinneqarsinnaapput. Oqallinnikkullu tamanna anguneqarsinnaavoq, Kanukokap siulittaasua Martha Abelsen oqarpoq.
Kommunit aningaasaqarnerniarnerat Kanukokap naalakkersuisullu akornanni oqallisigineqassaaq, suliassalli suut kommuninit aamma tiguneqassanersut aamma oqallisigineqassalluni. Tamanna pillugu juunip aallartilaarnerani aalajangiisoqartussaavoq.
