KANUKOKA allatut ilusilerneqassaaq
Kommunit kattuffiata siulersuisui aqagu marlunngornermi ataatsimiilerpata KANUKOKA pillugu annertuunik aalajangiisoqartussaassaaq.
KANUKOKA illoqarfiit pingaarnersaanni Nuummi ullumikkut inissisimaffeqarpoq, Kommuneqarfik Sermersuulli kattuffimmit ilaasortaajunnaarneratigut inissisimaffiata nuunneqarnissaa ilimanartupilussuuvoq.
Aggulunneqaratarsinnaasoq
Tusarfiit KNR-imut oqaluttuarput aaqqiissutissat assigiinngitsut eqqartorneqartut, ilaatigut aggulunneqarsinnaanera, taamaaliornikkut kattuffimmi suliffiit Ilulissanut, Sisimiunut Qaqortumullu agguataarneqassallutik.
Aamma atuaruk Palle Jerimiassen: Asii Chemnitz Narup paasinerluisimavoq
KANUKOKA-p siulittaasuata Palle Jeremiassenip KNR-imut uppernarsarpaa KANUKOKA-p inissisimanera aqagu marlunngornermi ataatsimiinnermi eqqartorneqassasoq.
Sulisorisanut sunniuteqassaaq
Siulersuisulli ataatsimiitsinnagit Jerimiassen tamatumunnga tunngasumik oqaaseqarusunngikkallarpoq, ataatsimiittoqareerpat kommunit pingasuusut aaqqiissutissatut isumaqatigiissutigisaat saqqummiuttussaassagamiuk.
Aammattaaq erseqqissaatigaa Nuummi sulisorisanut tunngatillugu arlalinnik inisseqqaagassaqarmat oqaaseqarsinnaanngikkallarluni.
