Kannguttaatsuliorneq pillugu eqqartuussivimmi suliassaq kinguartinneqartoq
KNI-p pisortarisimasaanut, Peter Grønvold Samuelsenimut tunngasumik Eqqartuussiveqarfik Qeqqa ullumi aqagulu suliaqartussaagaluarpoq.
Suliassarli, kannguttaatsuliorsimanermut tunngassuteqartoq, piffissaligaanngitsumik kinguartinneqarpoq.
Eqqartuussisoqarfik Qeqqa KNR-imut taama ullaaq manna paasissutissiivoq.
Kinguartitsineq Nuummi mittarfiup quasannera pissutigalugu timmisartumik qangattartoqarsinnaannginneranik peqquteqarpoq.
Taamaammat eqqartuussivimmi suliamut pingaaruteqartut arlallit Nuummiit aallarsinnaanngillat.
Tamatuma saniatigut eqqartuussiviup videokkut peqataatitsinermut atortorissaarutaa internettimut attaveqannginnera pissutigalugu atorsinnaanngikkallarpoq.
Eqqartuussisoqarfik Qeqqatap eqqartuussivimmi suliaq qaqugu ingerlanneqassanersoq suli oqaatigisinnaanngilaa.
Tamannali decembarimi pinavianngitsoq qularutissaanngilaq.
Pinngitsuunerartoq
KNI-mi pisortaanerusimasoq suliffeqarfimmi atorfeqarnermi nalaani arnanut katillugit tallimanut kannguttaatsuliorsimasutut pasineqarpoq.
Unnerluussissut KNR-ip takunnissinnaaffigisaa naapertorlugu kannguttaatsuliornerit nassuiaatigineqartut KNI-p allaffiani aamma suliffimmut atatillugu angalanerni 2016-ip 2021-llu akornanni pisimapput.
Unnerluussisussaatitaasut unnerluutigisap qaammatini pingasuni pineqaatissinneqarsimasunut inissiisarfimmiinnissaa piumasaraat, Peter Grønvold Samuelsenili pinngitsuutinneqarnissani anguniarpaa.
KNI-mi pisortaasimasoq kannguttaatsuliorsimasutut politiinut unnerluutigineqartoq marsimi saqqummiunneqarpoq.
Peter Grønvold Samuelsen tamanna sioqqutitsiarlugu atorfimminit soraarpoq.
Taassuma soraarneranut suna pissutaanersoq piffissami tassani saqqummiunneqanngilaq.
Peter Grønvold Samuelsenili suliffeqarfiup iluani innimiilliortoqartarneranik misissuisoqarnerata kingunerisaanik soraaqquneqaqqaariarluni KNI-mit soraarsinneqarsimasoq KNI-p siulersuisuisa nutaat oktobarimi paasissutissiissutigaat.
Peter Grønvold Samuelsen KNI-mi ukiuni arfineq-marlunni pisortaaneruvoq.